Kantuz sortu da, eta kantuz nahi du urtea agurtu. Halaxe egingo du Jon Maia bertsolari eta musikariak (Urretxu, Gipuzkoa, 1972) Kantu berri bat gara disko-liburuaren (Elkar, 2023) aurkezpen biran, bi ekitaldi baititu urteko azken asteburuan.
Gaur egingo dute lehena, Zestoako kiroldegian 18:00etan. Sarrerak udal bulegoan zein sarean eskuratu daitezke. Bihar, berriz, Gasteizko XII. Aitzina Folk jaialdi solidarioan izango dira, Karmele Jaio, Paul Urkijo, Edorta Lamo, Oihane Perea, Nerea Martinez, Lukas Etxeberria eta beste hainbat gonbidaturekin batera. Kontzertua 19:00etan hasiko da, Mendizorrotzako kiroldegian, eta sarrerak jaialdiaren webgunean eros daitezke. Lehen aldiz egingo dute ikuskizuna Araban.
Sortzaileak hamalau kantu bildu ditu denera iaz kaleratutako disko-liburuan: hamar berri eta lau bertsio. Horrez gain, 60 orrialdeko olerki jarraitu bat ere idatzi du. Transmisioa eta identitatea ditu ardatz, eta, Maiaren arabera, sortu duen lanik «handiena» da: «Lan global eta integral bat, fronte asko dituena». Horiek guztiak zuzenean aurkeztu ditu aurten, Euskal Herrian hara eta hona. Orotara, laurogei kontzertu inguru egingo ditu. Nolanahi ere, zorretan da bere herriarekin.
Itzurunera itzuliko dira doinuak
Hain zuzen, irailaren 21ean Zumaiako (Gipuzkoa) Itzurun hondartzan egitekoa zen ikuskizuna bertan behera utzi zuten, eguraldi iragarpenaren ondorioz. Horrenbestez, «udaberrira begira» jarriko zirela iragarri zuen Maiak X sare sozialean, «mareak, asteburuak, eguraldiak bat egingo duten data berri baten bila».
«Ez da kontzertu soil bat izango: ikuskizun errepikaezin bat izango da» esanez iragarri zuen sortzaileak Zumaian egitekoak ziren emanaldia. Herriari egindako omenaldi gisa pentsatuta dago Kantu berri bat gara. Harri eta herri emanaldia. Maiarentzat berarentzat inspirazio iturri izan dira bai Itzurun, bai eta haren inguruak ere; hala ikusten da Kepa Junkerari egindako Mareak Zumaian, Ken Zazpiri egindako Itsasoa gara eta Benito Lertxundiri idatzitako Itsasoari begira kantetan, esaterako.
Datorren urteko kontzertuei dagokienez, kontzertu bakar bat baieztatu dute oraingoz: urtarrilaren 31n egingo dutena, Elgetan (Gipuzkoa).
