JUDASH
'Judash'
Argitalpena: Egilea editore.
Abiadura bereziki gustuko duen heavy metala lantzen du 2017an Eibarren Judas Argarate izenarekin sortutako taldeak. Egitura instrumental eta zati melodiko batzuetan Su Ta Gar eta baita Latzen taldea ere gogora ekar dezakete. Edozein kasutan, indarrik falta ez zaion grabazioa da, baina akaso melodia zenbaitetan lortzen dute erakargarritasunik handiena: Bizi-ren ahots bikoiztua oso adierazgarria dugu, baita Dispara-ren sarrera bizkorra ere, teklatuen bultzada pizgarria dakarrena. Metalmorfosia-ren kolorea, errepika altua eta pianoa ere aipagarriak dira, Nostalgia-ren abiadura eta teklak originalak, bideoklipa duen entitate handiko Gerra eta Askaturik balada heavy prototipiko eta ederraz gain. Amaiera instrumentala (Hil), pianoa eta heavya uztartzen dituena, lanaren gailurretako bat dugu.
