JONSI
'First Light'
Diskoetxea: Lakeshore Records.
Badute islandiar musikariek berezkoa duten zerbait, glaziar izoztuak, ur-jauzi izugarriak, belardi zabalak irudikatu eta isiltasuna transmititzen duena, zentzumen guztiak aktibatzen dizkizuna. Bada, Jonsiren azken diskoak dituen hamalau pieza hauetan ere denbora gelditu egiten da, bizi-erritmoa geldotu eta musika sentitzera eramaten zaitu, sinbiosi instrumentala —soka eta perkusio bikainez gidatua—, analogikoa, elektronikoa eta klasiko nahiz abangoardiakoa uztartuta. Entzunaldi horretan murgiltzea norberaren buruari kalitatezko une bat oparitzea da; ezbairik gabe, First Light Islandiako healing music edo sendagai-musika delakoaren aitzindari zehatza izan liteke.
