Jon Benitoren 'Bulkada', Poesia Gazteko Hernandez sariko finalista

Jon Benitoren Bulkada poema liburua (Susa, 2010) finalista izan da Poesia Gazteko Miguel Hernandez Sari Nazionalean. Irabazlea Laura Casiellesen Los idiomas comunes (Hiperion, 2010) izan da, eta horri esker 20.000 euro jasoko ditu egileak. Espainiako sari nazionaletan ez da normalean finalista izendapen ofizialik egiten, baina kasu honetan salbuespena egin, eta Bulkada finalista izendatzea erabaki du epaimahaiak, egileen gaztetasuna eta bi obren kalitatea aintzat hartuta. Saria sortu berria da, eta aurten emango da aurreneko aldiz. Espainiako Estatuaren mugen barruan 31 urtetik beherako poetek 2010ean argitaratutako liburuen arteko onena hautatu behar zuten epaimahaikideek. Rogelio Blanco Espainiako Liburuaren zuzendari nagusia buru zutela, Angel Erro, Dario Villanueva, Dario Xohan, Clara Janes, Susana Rafart Corominas, Fernando Broncano, Balbina Prior Barbarroja, Mario Caballero Sanchez eta Veronica Aranda izan dira epaimahaikide.