Hamabost urteko ibilbidearen ondoren, 2018an eman zituzten bukatutzat Eako Poesia Egunak. Ean (Bizkaia) egiten zituzten uztailero, eta Herriari Emon Arnasa elkartea arduratzen zen haiek antolatzeaz. Hutsune hori ikusirik, Irailekoak izeneko poesia jaialdia jarri zuen martxan iaz Euskaltzaindiak. Hasieratik iragarri zutenez, ordea, ez dute festibala urtero leku berean egiteko asmorik, eta, horregatik, Itsasun (Lapurdi) egingo dute aurtengoa.
Egun eta erdiko programa izango dela aurreratu dute oraingoz. Irailaren 28an, egun osoz, eta irailaren 29an, goizez. Euskal poeten lana gizarteratzea da helburua, baina nazioarteko poetak ere izango direla esan dute.
Poemak erakusleihoetan
Hitzaldiak eta irakurraldiak izango direla ere azaldu dute, baina irailean emango dute programa zehatzaren berri. Oraingoz, Itsasun poesiari «presentzia handiagoa» emateko, hainbat poetaren bertso lerroz jantziko dituzte herriko erakusleihoak. Tartean, Forugh Farrokhzad, Anne Sexton, Jose Luis Otamendi, Miren Agur Meabe, Aurelia Arkotxa, Bernardo Atxaga, Raymond Carver, Angel Erro, Castillo Suarez, Itxaro Borda, Jon Gerediaga eta Alejandra Pizarnik-en bertsoak erakutsiko dira.
Oraingoan, Itsasuko Herriko Etxearekin, Euskal Kultur Erakundearekin eta Euskararen Erakunde Publikoarekin elkarlanean antolatu du egitaraua Euskaltzaindiak.
