Udaberriko doinuetan murgiltzeko, Maiatz argitaletxeak lau liburu berri aurkeztu ditu. Kariñe Errazkinen Lertxunek ekarri zuten eleberria; Jean-Louis Davanten pastoraletako kantuen eta poemen bilduma bat: Hegiz hegi; Antton Kazabonen Itsasoa noraino, haraino poesia liburua; eta Xabi Kastoreneren Uztaritzeko kotilunak.
Liburuak argitaratzeko galde «anitz» ukaiten badituzte ere, Luzien Etxezaharreta Maiatz argitaletxeko koordinatzaileak azpimarratu du Maiatzen «44. primadera» dela aurtengoa, eta ohi bezala liburuak plazaratzeko «indarra» atera dutela erran du. Nahiz argitaletxea independentea den gauza batzuk «aldatu» direla gaineratu du. Bertzeak bertze, Euskal Kultur Erakundearen eta Euskararen Erakunde Publikoaren laguntza errezibitu dute Maiatz aldizkaria egiteko, liburuen aurkezpenak antolatzeko eta lau liburu argitaratzeko.
Lau liburu berri
Antton Kazabonek Itsasoa noraino, haraino poesia liburua aurkeztu du. Haur eta gazte literaturatik atera eta poesiara jauzi egitea erabaki du, «barneko min guziei» hitza emateko. Kazabonen ustez, poesia terreno «deserosoa» izanik ere, barnean daraman hori kanporatzeko gogoz idatzi du poesia liburua, Jokin Mitxelenaren marrazkiez apaindurik. Gaztetako «minetatik» hasita, poema autobiografikoak ditu Kazabonen liburuak. Autobiografia horretan, itsasoa bere minak «kanporatzeko» sendagai gisa interpretatu du idazleak Itsasoa noraino, haraino poeman. «Askotan askatzen dizkit korapiloak/ itsasoko olatuen braustada hots zalapartatsuak».
Bertzalde, Kazabonek Xabier Leteren kantuak gogora ekarri ditu, «garaiko min guziak» aipatu zituen Leterekin «oso identifikatua» sentitu zelako. Hain zuzen, Jardin bat zuretzat kantuari «apalki» erantzuten dio Zeruko jardinetan poemarekin. «Zeruko jardinetan nolako plazera!/ Lurdesekin kantari betiko antzera/errota zahar maitea edo Habanera/ lurtarra hintzeneko ametsa bete da/zorion guztizkoa horixe ote da?».
«Uztaritzen diren bi mundu kontatu nahi izan ditut: euskal kultura sustatzen duen mundu militantea eta mundu indibidualista eta kontsumista gurutzatu ditut kontakizunean»XABI KASTORENEIdazlea
Xabi Kastoreneren Uztaritzeko kotilunak liburua, berriz, ez da poesian murgiltzen. Kotilunen mundu «berezia» deskribatu du euskaraz eta frantsesez argitaratu liburuan. Liburua «ezin definitua» den arren, hiru partetan banatu du «ez-fikziozko» kontakizuna. Lehengoan, Ihauterien tradizioa aipatzen du Kastorenek. «Gazteei esker biziberritzen ari diren ohiturak» direla eta, ihauterietatik abiaturik, ondotik bi errealitaterekin topo egiten duela zehaztu du idazleak. Horiekin osatu du bigarren atala: «Uztaritzen diren bi mundu kontatu nahi izan ditut: euskal kultura sustatzen duen mundu militantea eta mundu indibidualista eta kontsumista gurutzatu ditut kontakizunean». Liburuaren azken partea, berriz, «bere bizipenekin» osatu dituela adierazi du.
Hegiz hegi, lertxunen bidetik
Jean Louis Davantek eta Kariñe Errazkinek ezin izan dute prentsaurrekora jin, eta haien liburuak laburki aurkeztu ditu Etxezaharretak. Kariñe Errazkinen Lertxunek ekarri zuten liburua «apaina» dela erran du. Biografia baten antzekoa da karrikaratu duen eleberria, eta, Etxezaharretaren arabera, «idaztearen problematika» aipatzen du Errazkinek. «Erreferentzia literario anitz ederki josiz, idazleak memoria kolektiboaren idazketaren problematika aipatzen digu».
Hegiz hegi da Maiatz argitaletxeak argitaratu berri duen bertze liburua. Etxezaharretaren erranetan, Jean Louis Davantek pastoralen karietara idatzi kantuak, haren gogoetak eta prentsan argitaratu zituen artikulu batzuk bildu ditu Maiatzek. «Atzo hala, egun nola, eta bihar nola» hiru kapituluetan barna Zuberoako «aberri berezia» bere «ohizko goxotasunarekin» plazaratzen dituela goraipatu du Etxezaharretak.
