Hatortxu Rock jaialdiko antolatzaileek Itzulera eguna izendatu dute biharko eguna, otsailaren 4a, eta jakinarazi dute uztaileko festibalari buruzko informazio esanguratsua ematekoak direla egunean zehar, hiru kolpetan. «Itzulera» banaren berri emanen dute 8:00etan, 12:05ean eta 16:00etan. Izan ere, iragarri dute hainbat urtez jo gabe egondako taldeak direla eta jaialdirako propio bueltatuko direla.
Ikusi gehiago
Iazko ekainean aditzera eman zuten festibalak 2025ean izanen zuela akabera. Zehazki, jakinarazi zuten bi alditan esanen zutela agur: aurrena, Atarrabian (Nafarroa) eta «ohiko moldean», egun bakarreko egitarau batekin —abenduaren 28an egin zuten hori—; ondotik, Lakuntzan. Eta, datak iragartzeaz gain, nabarmendu zuten Lakuntzakoa «jaialdi historikoa» izanen zela; «erraldoia». Uztailaren 24tik 27ra eginen dute.
Datak iragarri bai, baina artean ez dute jakinarazi zehazki zenbat talde ariko diren festibalean. Dena dela, abenduaren hondarrean plazaratu zuten parte hartuko duten taldeen zerrendaren lagin bat. Gaur-gaurkoz, kontzertu hauek daude iragarrita: Bulego, Nogen, Tatxers, Skabidean, Streetwise, Banda Bassotti, Gozategi, Eñaut Elorrieta, Los Zopilotes Txirriaos eta Betagarri. Bihar beste hiru izen emango dituzte: jaialdirako espresuki itzuliko direnenak.
