Hemezortzigarrenez egingo dute Bilboko letren nazioarteko jaialdia. Arte eta literatur sorkuntzari eskainitako topaketak dira, eta aurten otsailaren 25etik martxoaren 1era egingo dute. Halaber, duela hiru urte hasi ziren BBK Gutun Zuria Bilbo sariak banatzen, euskal autoreen eta nazioartekoen ibilbideari aitortza egiteko. Laugarren aldi honetan, Itxaro Borda (Baiona, 1959) eta Leila Guerriero (Junin, Argentina, 1967) idazleak sarituko dituzte jaialdiaren irekieran.
Antolatzaileen arabera, euskal eta nazioarteko literatura garaikideko «erreferenteak» dira. Alde batetik, euskal literaturan egindako «ekarpenak» eta «berrikuntzak» eskertu nahi izan dizkiote Bordari. Bestetik, Guerriero Hego Amerikako kazetaritza narratiboko idazle handienetako bat dela adierazi dute.
Horrez gain, jaialdiaren egitarauan parte hartuko dute bi idazleek. Guerrierok solasaldi bat eskainiko du Rodrigo Fresan idazle, itzultzaile eta kazetariarekin batera, lehen egunean. Jaialdia ixteko ardura, berriz, Bordarena izango da, hark hitz egingo baitu azken egunean.
Aurreko aldiak
2022. urteaz geroztik, Gutun Zuriak hauek saritu ditu: Miren Agur Meabe eta Theodor Kallifatides; Anjel Lertxundi eta Cristina Rivera Garza; Mariasun Landa eta Juan Mayorga.
