Bidasoa ibaia zeharkatzen duten migratzaileak, Balkanetako gerraren ondorenak, AEBetako eskubide zibilen aldeko borroka, Pakistango pertsona gorrak, Argentinako mobilizazioak, Nigeriako hirigintza eredu neoliberala... Beste urte batez, mundua alderik alde zeharkatzen duten eta giza eskubideekin lotura duten auziei buruzko filmak bildu ditu Donostiako Giza Eskubideen Zinemaldiak. Bihar ostirala hasi eta hilaren 11ra arte, 25 herrialdetako 48 film bistaratuko ditu jaialdiak, eta Helena Taberna zinemagileak bere ibilbide osoa aitortuko dion sari berezia jasoko du aurten, festibalaren 22. aldian.
Asier Urbietaren Faisaien irla euskarazko filmak inauguratuko du jaialdia, Donostiako Viktoria Eugenia antzokian. Zuzendariak Bidasoa ibaia gurutzatzen duten migratzaileak hartu ditu ardatz bere lehen film luzean, eta Jone Laspiur, Sambou Diaby, Itziar Ituño eta Josean Bengoetxea bildu ditu aktore taldean.
Jaialdia ixteko, berriz, India Donaldson estatubatuarrak zuzendutako Good One ekoizpen estatubatuarra programatu dute; lehiaz kanpo emango dute, Viktoria Eugenian hori ere, film luze eta laburren sariak banatuko dituzten ekitaldian. Zinemaldiari amaiera emateko ekitaldian egingo diote Tabernari ere bere ibilbide osoaren aitortza.
Inaugurazioaren eta bukaerako galaren artean egingo dituzte beste film guztien emanaldiak, Viktoria Eugenian gehienak, baina baita Antzoki Zaharrean —tartean, Zinema eta Biktimologiako II. Ziklokoak zein ikasleentzako proiekzioak— eta Tabakaleran ere —Zinema eta Memoria zikloko hiru film bistaratuko dituzte—. Denera, 25 film luze eta 23 labur izango dira, eta, ia egunero, protagonisten, zinemagileen eta landutako gaietan adituak direnen solasaldiekin osatuko dituzte saioak. Hiru erakusketa eta bi mahai inguru ere antolatu dituzte jaialdian.
Uztartuta azaldu dituzte zinema eta gizarte eragiletza antolatzaileek: «Zinemaldiaren helburua da kalitatezko zinemaren bidez giza eskubideen defentsaren eta urraketaren hainbat alderdiri buruzko hausnarketa, sentsibilizazioa eta eztabaida bultzatzea, baita justizia eta ekitate sozialarekin konprometitutako herritartasun aktiboa sustatzen laguntzea ere».
Hiru sail nagusi
Film luzeen Sail Ofizialean hamabost lan erakutsiko dituzte, eta haietatik hamabi izango dira lehian. Azken horien artean, Faisaien irla-rekin batera, beste bi euskal ekoizpen izango dira: Lara Izagirreren Empoderío, eta Paula Iglesias eta Marta Gomezen Flying Hands —bi horien emanaldien ondotik, solasaldiak izango dira zuzendariekin—.
Munduko beste bazter batzuetatik helduko dira Donostiara lehiatuko diren gainerako filmak: Monica Taboada-Tapiaren Alma del desierto (Kolonbia-Brasil); Susanne Rostocken Following Harry (AEB); Boris Lojkineren L’Histoire de Souleymane (Frantzia); Lidija Zelovicen Home Game (Herbehereak); The Agbajowo Collectiveren The Legend of the Vagabond Queen of Lagos (Nigeria-Alemania-Hegoafrika-AEB); Bogdan Mureşanuren Anul Nou care n-a fost / The New Year That Never Came (Errumania-Serbia); Ted Passonen Patrice: The Movie (AEB); Luciana Kaplanen Tratado de invisibilidad (Mexiko); eta Jiri Madlen Waves Vlny / Waves (Txekiako Errepublika-Eslovakia).
Horietaz gain, bukaerako filma ez ezik, Camilo de Castro eta Brad Allgooden Patrullaje (Nikaragua-AEB) eta Carlos Castroren Éramos tan flacos ere (Argentina) emango dituzte sail berean, lehiaz kanpo.
Film laburrei dagokienez, berriz, hamabi izenburu jaso dituzte Nazioarteko Film Laburren Sail Ofizialean —Brasil, Iran, Palestina, Espainia, Norvegia eta Italiako lanak daude tartean, besteak beste—, eta beste zortzi Euskal Film Laburren Sail Ofizialean. Azken horien artean, zazpi izango dira lehian:16060 egun (Iñaki Alforja, Iban Toledo), Azkena (Ane Ines Landeta, Lorea Lyons), Capitanes(Kevin Castellano, Edu Hirschfeld), Errotatiba(Iratxe Fresneda), Gure oilarra kanpoan da(Carlota Galilea), Locas del ático (Tamara Garcia Iglesias), eta Patrimonio (Aitor Abio). Nagore Ezeizaren Zona Waolehiaz kanpo erakutsiko dute.
Hiru sail horietakoak ez ezik, Amnesty International Saria ere banatuko dute.