Gora euskal kantugintza proiektua aurkeztu du Gipuzkoako Foru Aldundiak, 12 eta 16 urte bitarteko nerabeen artean euskal musika eta kultura ondarea ezagutarazteko asmoz. Gida didaktiko bat da, eta eskuragarri dago jada Kultura Eskolaren katalogoan. Izan ere, programa horren barruan kokatu dute. Mikel Markez abeslaria eta Pako Aristi idazlea dira proiektuaren sortzaileak, eta Gipuzkoako Foru Aldundiarekin elkarlanean aritu dira. Donostian egindako prentsaurreko batean aurkeztu dute gida, eta, sortzaileez gain, bertan izan da Goizane Alvarez Kultura, Lankidetza, Gazteria eta Kirol Departamentuko foru diputatua.
Gida didaktikoak ibilbide luzea egiten du euskal musikaren historian zehar. Bereterretxen kanthoria-rekin hasi, eta gaur egungo Izaro, Zetak eta Olatz Salvador artistengana iritsi arteko bidaia hamalau ataletan antolatuta ageri da. Horietan, hainbat gai aztertzen dira: besteak beste, abesti tradizionalak, Ez Dok Amairuren sorrera, euskal rock erradikalaren gorakada, literaturaren eragina, bertsolaritza, eta plataforma digitalen eta sare sozialen inpaktua.
Atal bakoitzak ikasleen «ikaskuntza aktiboa eta gogoetatsua» sustatzeko diseinatutako jarduerak eta galdetegiak biltzen ditu amaieran. Baita garai bakoitzeko zenbait abestiren hitzak ere.
Sortzaileak sorkuntzan
Mikel Markez eta Pako Aristi sortzaileak arduratu dira gida egiteaz, eta prentsaurrekoan bertan nabarmendu dute ikasleek euskal ondarea ezagutzearen garrantzia. «Herri baten kultura ez da ezerezetik sortzen, baizik eta denbora askoan pilatu den jakinduria kultural baten ondorioz; mende askotan garatu izan da, eta garai bakoitzak zeuzkan tresnak erabilita», adierazi du Aristik.
