Gerturatzen doan sugarra

Leon eta Felix lagunak dira, eta Alemaniako kosta baltikotik gertu dagoen basoa zeharkatzen ari dira. Autoa hautsi eta oinez jarraituko dute. Zuhaitz artean dagoen etxe batera iritsiko dira, Felixen amarenera. Izan ere, lanera etorri dira bi gizonak: Felixek argazkiak prestatu behar ditu proiektu baterako, eta Leonek bere bigarren eleberria idazten bukatu beharra dauka. Etxea ez dago hutsik, ordea. Nadja izeneko emakume bat eta, zenbait gautan, haren maitale Devid soroslea daude bertan.

Leonek idazteko zailtasunak ditu, bere azken lanaren kalitateari buruz bueltaka dabil, eta etxean dituen distrakzioak aitzakia ona dira idazten ez hasteko. Lanerako dituen zailtasunei harremantzeko duen era traketsa gehituko zaie, oraindik ere bizi ez dituen egoera guztiak argitara atereaz.

Era berean, inguruko suteei buruzko albisteak gero eta kezkagarriagoak izango dira, eta, altuera baxuan hegan egiten duten ur-ponpak jaurtitzen dituzten hegazkinen soinua ohikoagoa bihurtzen den heinean, zerbait gertatuko den susmoa piztuko da gazteengan.

Christian Petzold pandemia garaian hasi zen Roter Himmel-en gidoia idazten. Konfinamendua iragarri zutenean Parisen zegoen Petzold, Paula Beer aktorearekin Undine filma aurkezten. Biak COVIDarekin kutsatuta iritsi ziren Alemaniara, eta Petzold, sukarraren eraginez, amets oso biziak izaten hasi zen. Era berean, Eric Rohmerren filmografia guztia ikusteko aukera izan zuen, eta Frantzian nahiz AEBetan udako filmak izenburuarekin ezagutzen den generoari buruz hausnartzen hasi zen: gurasorik gabeko bi hilabete erretratatzen dituzten filmak dira, gazteek beren nortasuna bilatzeko erabiltzen dituztenak. Munduari buruz zerbait erakusten duten hilabeteak dira. Buruan ideia hauek zituela, eta Txekhoven eleberri motz bat irakurri ondoren, hasi zen Petzold Roter Himmel-en istorioa idazten.

Petzolden aurreko filmekin alderatuz gero, arinagoa dirudi Roter Himmel-ek: Rohmerren eragina, udako maitasunak, erabilitako umorea, itxuraz duen inplikazio politikorik eza… Istorioak aurrera egin ahala, ordea, ilunagoa bilakatuko da, eta zerbait gertatuko deneko sentipena areagotuz joango da. Protagonistaren baldarkeriak agerian jarriz, baina bere zaurgarritasuna era finean erretratatuz, zinemagile alemaniarrak nahieran moldatzen ditu pelikula genero eta estiloak, batetik bestera salto eginez, eta istorioaren estrukturarekin jolasten du, batzuetan ikuslea desorientatuz, baina, eta berean, filma zirraragarriagoa bilakatuz.

Beste estreinaldi batzuk

Bielorrusiaren eta Poloniaren arteko muga berdea deiturikoa osatzen duten basoetan, Europako Batasunera iritsi nahi duten Ekialde Hurbileko eta Afrikako errefuxiatuak Aleksander Lukaxenko Bielorrusiako estatuburuak diseinatutako krisi geopolitikoan harrapatuta gelditzen dira. Izan ere, errefuxiatuak mugara erakartzen dira, EBrako sarrera erraz bat agintzen duen propagandarekin. Ezkutuko gerra honetan, bere bizitza erosoari uko egin dion aktibista baten (Julia), Jan mugazain gaztearen eta siriar familia baten bizitzak gurutzatuko dira.

Alaina nekatuta dago Pine Ridgeko erreserban polizia ofiziala izateaz, eta bere irratiari erantzuteari uztea erabakiko du. Sadie ilobak gau luzea emango du haren zain, eta, zaurituta, bere aitonaren laguntzarekin bidaiatzea erabakiko du: denboran eta espazioan zehar Hego Amerikaraino hegan egingo du, eta zuri-beltzeko western zaharrak ikusteari utziko dio.

Serbia, 1996. urtea. Milosevicen erregimenaren aurkako ikasle manifestazioetan, 15 urteko Stefanek iraultzarik gogorrena bizi beharko du. Bere amari aurre egin beharko dio, gobernu ustelaren bozeramaile eta konplizeari.