Ehun musikari gazte zein irakasle baino gehiago elkartu dira hamar egunez Euskal Herriko Gazte Orkestrak antolatutako egonaldi artistikoan. Udako bira prestatzea dute helburu: bost kontzertu emango dituzte Ruben Gimenoren gidaritzapean. Hondarribiko (Gipuzkoa) Itsas Etxea auditoriumean izango da lehena, hilaren 18an; uztailaren 19an, Azkoitian (Gipuzkoa), Baztartxo udal antzokian; 20an, Donostiako Viktoria Eugenia antzokian; 21ean, Bilboko Euskalduna jauregian; eta Gasteizen amaituko dute, Principal antzokian, uztailaren 22an.
Seohyun Kim korear biolinista gaztearen parte hartzea izango da kontzertuen «berezitasuna», Gazte Orkestraren esanetan. Txaikovskiren Biolinerako kontzertua joko du 15 urteko biolinistak. Kimek aitortu du obra benetan berezia dela: «Sakontasun emozional eta teknika bikainak ditu». Gaineratu du «gogotsu» dagoela euskal entzuleen aurrean pieza jotzeko, baita esperientzia bizitzeko «irrikaz» ere. Korear gazteak Tibor Varga nazioarteko biolin lehiaketa irabazi zuen, Suitzan.
Orkestrak lehen aldiz joko du Txaikovskiren obra hori. Hondarribiko emanaldia Dvorak musikagile txekiarraren Haizezko instrumentuentzako serenatak osatuko du. Gainerako kontzertuetan Mussorgskyk konposatu eta Ravelek egindako doikuntzetatik sortutako Erakusketa bateko margolanak joko dute. Iban Garate izango da azken obra horren narratzailea. Sarrerak EGO fundazioa helbidean eros daitezke.
