FANTASTIC NEGRITO
'Son of a Broken Man'
Diskoetxea: Storefront Records.
Batzuetan gertatzen da kasualitate hutsez artista bat deskubritu eta harekin kateatzea. Izenak kuriositatea sortuta hasi nintzen entzuten lehen aldiz Fantastic Negrito, eta jada ibilbide luzea duen musikaria dela jakin nuen. Blues, funk, rock eta R&B doinuak jorratzen ditu eta argitaratu berri du zazpigarren lan luzea. Beste batzuk bezain borobila iruditu ez bazait ere, gustura entzuten da Son of a Broken Man hau, indie eta rock doinuetan aurrekoetan baino gehiago murgiltzen den diskoa. Abesti ederrak izanagatik, diskoa osotasunean kohesionatuagoa izatearen falta sumatu dut, baina, hala ere, kantuak banan-banan hartuta, oso gustura entzuteko piezak direla iruditzen zait.
