Gorabidean dagoen pertsona bat saritzen du Fant Bilboko Zinemaldi Fantastikoak urtero, eta aurtengoan Enrique Buleo zinema zuzendari espainiarraren lana aitortu nahi izan dute antolatzaileek. Horregatik eman diote Fantrobia saria. Decorosa, El infierno y tal eta Las visitantes film laburren egilea da Buleo, eta hamaika sari jaso ditu haiei esker. Bere lehen lan luzea aurkeztu du aurten: Bodegón con fantasmas. Eta sariak jaso ditu horri esker ere. Kritikaren Saria eman diote bai Espainian egiten den Abydine jaialdian, bai eta Donostiako Fantasiazko Zinemaren Astean ere.
Maiatzaren 2tik 10era egingo dute aurtengo Fant Bilboko Zinemaldi Fantastikoa, eta antolatzaileak hasiak dira egitarauaren lehen nondik norakoak ezagutarazten. Sail Ofizialeko epaimahaia osatuko duten hiru kideen berri ere eman dute. Esty Quesada youtuber, aktore eta umoregileak, Diana Rojo gidoigile eta ekoizleak eta Justo Ezenarro Fanteko zuzendari izandakoak erabakiko dituzte sail horretako sariak. Eta Ainhoa Urgoitiak, Gigi Romerok eta Ivan Villamelek, berriz, Panorama Fantastikoa sailekoak.
Festibalaren aurretik egin asmo dituzten hainbat hitzaldiren berri ere eman dute. Felipe Mujika idazle barakaldarrak, esaterako, Akira animazio film ezagunari buruz idatzi duen liburua aurkeztuko du apirilaren 23an. Horrez gainera, Zeren beldur? erakusketa ere antolatuko dute Abandoko udaltegian. Jaialdiaren kartelerako oinarri hartzen dituzten margolanak jarriko dituzte bertan ikusgai, eta apirilaren 22an irekiko dute. Kontzertu bat ere izango da apirilaren 30ean. She is a Devil taldeak zuzenekoa eskainiko du Bilborock aretoan.
Liburu aurkezpenak eta erakusketak
Maiatzaren 2tik 25era Space Opera euskal komikian erakusketa zabalduko dute Begoñako udaltegiko liburutegian, eta espaziora egindako bidaiei eskainitako euskal komikigintzaren aleak ikusi ahalko dira bertan. Horrez gain, fantasiaren generoa zeharkatzen duten genero desberdinkeriei buruzko liburu baten aurkezpena egingo dute maiatzaren 3an. Horror Girls. WomanInFan Europa argitalpena aurkeztuko dute Monica Garcia Massague Sitges Fundazioko zuzendariak eta Begoña del Teso zinema aditu eta BERRIAko kolaboratzaileak.
Eskola magistral bat ere emango du Buleok maiatzaren 8an, eta epaimahaiko kide Quesadak, berriz, kontzertua eskainiko du maiatzaren 9an. BBK Aretoan izango da ikastaroa, eta Kobak aretoan musika emanaldia.