«Euskal kulturaren oholtzan kaka mokordo bat agertu da. Kaka azaleratu da eta egoeraren analisi bat egin behar da. Nork egin du? Noiztik dago hor? Zer irudikatzen du? Eta orain, zer egiten da kaka honekin? Noren ardura da? Nori dagokio marroi hori argitzea? Garbitzea? Kakak kaka dakar eta pentsatzen jarrita... Mundua nolakoa litzateke bakoitza bere kakaren jabe egingo balitz?». Horra AEK-Korrika kultur sorkuntzarako bigarren beka irabazi duen Kaka proiektuaren sinopsia. Xanti Agirrezabala eta Erika Olaizola aktoreek aurkeztu dute proiektua, gaur, Gasteizko Izaskun Arrue kulturgunean. «Thriller komedia bat izango da, eta lau pertsona ibiliko dira oholtza gainean ikerketa lanak egiten». Agirrezabala eta Olaizolarekin batera, Mikel Laskurain eta Ainhoa Aierbe ariko dira aktore lanetan.
Proiektuko kideekin batera, AEK-ko arduradun Lurdes Etxezarretak eta Ane Elordik ere eman dituzte AEK-Korrika kultur sorkuntzarako bigarren beka irabazi duen proiektuaren nondik norakoak. Joan den urteko maiatzean jakinarazi zuten Kaka proiektua izan zela irabazlea, eta, orduko hartan, antzezlanari buruzko zertzelada gutxi batzuk eman zituzten. Gaur eman dituzte xehetasun gehiago Kaka-ren ideia nagusiaz, lantaldeaz eta sortze prozesuaz.
«Norbanako, kolektibo edo herri moduan batzen gaituen, baina ezkutatzen dugun horren guztiaren azaleratze festa bat izango da Kaka», esplikatu du Agirrezabalak. Komedia bat izango da, edozein pertsonak izan dezakeen onarpen beharraren ertzak modu «intimo, ganberro, jostari eta probokatzailean» agerian jarriko dituena. Finean, tabuez eta konplexuez hitz egiteko aitzakia hartuta, publikoak bere burua identifikatua sentitzea da asmoa. «Guk gure kakak azaleratuko ditugu zintzoki oholtzan, eta, indibiduala dena kolektiboa ere badenez, denok identifikatuta egoteko modukoa izango da», erantsi du Olaizolak.
Emanaldiaren sortze prozesuan buru-belarri eta «oso gustura» murgilduta dago orain lantaldea. Azken emaitza 24. Korrika Kulturalaren egitarauaren barruan aurkeztuko dute, 2025eko azarotik 2026ko apirilera bitartean, zenbait emanalditan. Horretarako, 23.000 euro eman dizkiete bekaren bitartez, baina diru laguntza gehiagoren bila ari dira lantaldearen lan baldintzak «ahalik eta hoberenak» izan daitezen.
«Guk gure kakak azaleratuko ditugu zintzoki oholtzan, eta, indibiduala dena kolektiboa ere badenez, denok identifikatuta egoteko modukoa izango da»
ERIKA OLAIZOLAAktorea
Lau aktoreekin batera, lantaldea osatuko dutenen izenak ere jakinarazi dituzte: Esperanza Lopez ariko da eszena zuzendari lanetan, eta Ikerne Jimenezek hartuko du eszenografiaren ardura. Gidoia, berriz, Kepa Errastik idatziko du. «Dramaturgo batekin lan egiteko kaka-kapritxoa genuen», onartu du Olaizolak. Ilusio berezia egiten zien, dioenez. Errastik egingo du proiektuaren gidoiaren lehen zirriborroa, eta uda aurretik izango du lantaldeak, hortik aurrera haren gainean lan egiten hasteko. Uda ostean ekingo diete antzezlanaren entseguei.
Emaitza bera garrantzitsua izango da, baina are garrantzi handiagoa du euskarazko antzerkigintzari «ikusgarritasuna» emateak, Agirrezabalaren arabera. Hori posible egiteko, uste du AEK-k eta Korrikak antolatzen duten kultur sorkuntzarako beka «bultzada» ezinbestekoa dela: «Kultur masifikazioaren kontsumoaren erdian oasia garenok ikusgarri egiten gaitu».
Hirugarren beka deialdia
Hain justu ere, sorkuntza bekaren helburuez mintzatu da Etxezarreta, duela aste pare bat Odei Barroso bertsolari eta rap kantariak elkarrizketa batean esandako hitzak bere eginez: «Badakigu euskara eroso erabiltzeko eremuak sortzea, garatzea eta elkar lotzea ez dugula bat-batean lortuko, eta, beraz, gure oasiez baliatu behar dugula apurka-apurka bada ere, basamortua ureztatzeko».
AEK-ko arduradunak azaldu duenez, erronka horri helduta antolatu dute AEK-k eta Korrikak kultur sorkuntzarako bekaren hirugarren deialdia, 25. Korrika Kulturalaren «plater nagusia» izango dena. Oinarriek diotenez, beka deialdian parte hartzeko dokumentazioa urriaren 31rako aurkeztu beharko da. Proiektuak diziplina ugari edo bakarra barne har dezake, eta lanaren emanaldiek agertoki edo plaza batean aurkezteko modukoak izan beharko dute. Beka 23.000 eurokoa izango da, eta 2027ko azarotik aurrera aurkeztuko da 25. Korrika Kulturaleko egitarauaren barruan.
Halaber, gogorarazi dute Jalgi Hadi izeneko diru bilketa kanpaina abian dutela, euskarari eta Korrikari buruzko ikus-entzunezko bat zabaltzeko eta sustatzeko. Kanpaina apirilaren 25ean amaituko da, eta, gutxienez 30.000 euro behar dira.
