Ezkutuko rockeroen azken olatua, oraingoz

Ez dira askotan aritzen jendaurrean, baina horrek ez du esan nahi taldea desegin dutenik. Surfin Kaos rock-and-roll hirukotea 2016. urtetik ibili da agertokietatik aparte, eta hogei urte bete berritan itzuli da, tarte labur baterako. Joan den abenduan Donostian jo zuten, Nuevo Catecismo Catolico taldearen 30. urteurrena ospatzeko jaialdian, eta Bilbon joko dute datorren astean. Taldekideek esan dutenez, litekeena da horren ondoren berriro ezkutatzea bolada baterako.

Koldo Soretek, Ibon Etxebestek eta David Gil Gilito-k osatzen dute taldea. Lau disko dituzte kalean; azkena, 2010eko Goizalde surrealistak. Estilo bizia dute, 1970eko eta 1980ko urteetako punk, garage eta hard-rock ingeles eta estatubatuarraren eragina duena.

Azken urteetan gelditu gabe dabilen talde bizi bat izango dute lagun Kafe Antzokian: Ezpalak, Hortz aina hots hirugarren diskoa argitaratu berritan. Sarrerak salgai daude, 8 euroan.