Euskal zinemako filmak Ipar Euskal Herrian emango ditu Zineginek

Hasierako helburu berak dituztela berretsi dute Zinegin Hazparneko (Lapurdi) euskal zinemaren jaialdiaren arduradunek laugarren aldi honetan. Hau da, euskal zinema —euskaraz dena— Ipar Euskal Herriko publikoari ezagutaraztea. Jakinik euskal filmen hedapena ez dela hain sinplea: «Ez da egiten egiten ahal litzatekeen bezain ontsa», talde antolatzaileko kide Katti Pocheluren hitzetan. Izan ere, Hego Euskal Herriko filmei muga pasaraztea zaila da oraindik. Eta Ipar Euskal Herrian bertan egin filmentzat ere, zinema pantailak ez dira beti hain eskuragarri. Hortaz, Zinegin erakusleiho gero eta sendoagoa bihurtzen ari da. Azaroaren 19tik 22ra, beraz, 16 film ditu ekarriko Hazparneko zinema gelara. Aldi oroz, zuzendaria edo aktore bat etorriko da solaserako.

Horien artean, Ibai Agirrebarrena Mendibururen Bisaiak, jauziaren aurpegiak dokumentala estreinatuko dute. 1980 eta 1990eko hamarkadetan Euskal Herriko askapen prozesuaren alde gatazkan parte hartu zuten Frantziako nazionalitateko pertsonei hitza ematen die: «Beti harritu izan naiz gure mundutik hain urruneko jende batek izan duen inplikazioaren berri ukaitean», esplikatu dio Ipar Euskal Herriko Hitza-ri.

Dokumentalekin segituz, Gure sorlekuaren bila ere proiektatuko dute. Begi keinua da Josu Martinezen lan hori Hazparnera ekartzea. Dokumentalak oinarri duen Andre Madre hazpandar jeneralaren Gure sorlekua filma (1956) Zineginen bertan proiektatu zuten duela bi urte. Beste dokumentalen artean, Beltzean mintzo (Jon Sarasua), Arrakala (lan kolektiboa) eta Margodantza eta Galtzerdi berdeak (Oskar Alegria) daude. Fikzio sailean, Amama (Asier Altuna), Gernikako Batailoia (Iban Gonzalez), Izarren Argia (Mikel Rueda), Bingen (Ander Odriozola),Pikadero (Ben Sharrock), Euskal harriaren ABDak (lan kolektiboa), 80 egunean (Jose Mari Goenaga eta Jon Garaño) eta Txetxe ala hil (Garaziko talde bat). Haurrek Herensugeak: haritzaren bihotza (Ricardo Ramon eta Angel Izquierdo) izanen dute. Zinema-kontzertu bat eta euskal zinemaren inguruko mahai inguru bat ere izanen dira. Informazio guztia, helbide honetan: www.zinegin-festibala.eu.