Euskal Herria eta Kubaren artean

Kubatarra da Pepe Rivero, eta euskal herritarra, berriz, Maria Berasarte, eta biak elkartzen diren bidegurutzean sortzen diren musikek batzen dituzte biak. Pianoarekin lehendabizikoa eta ahotsarekin bigarrena. Elkarrekin landutako proposamena aurkeztuko dute gaur Donostiako Viktoria Eugenia antzokian: Delirio. Reinier Elizarde Negrón (kontrabaxua) eta Georvis Pico (bateria) izango dituzte lagun oholtzan.

Jazzarekiko eta sustraiekiko loturak batzen ditu bi musikariak, eta jazz ehundurekin interpretatuko dituzte beraien kantuak —Berasartek hiru disko ditu grabatuak—, nahiz pieza ezagunen bertsioak: Aquellas pequeñas cosas (Joan Manuel Serrat), Je ne t´aime pas (Kurt Weill), Estranha forma de vida (Amalia Rodrigues) eta Txoria txori (Mikel Laboa), besteak beste.