Euria ari du, Solea-ren etxetik ateratzen naiz eta metroa hartzen dut. Carrefourretik entsalada bat hartu, eta hotelera. Bi audio ergel bidaltzen ditut irrati batean jartzeko, diskoa aurkezten. Hurrengo goizean, ARCOra noa, Radio3-ek han muntatu duen postuan pare bat abesti kantatzeko eta elkarrizketa txiki bat egiteko. Jendea gelditu eta begira geratzen da segundo batzuk, argazkitxo bat atera, eta bere bidea jarraitzen du. Zoo aseptiko batean bezala.
Hotelera noa, zerbait jan, eta soinu probara abiatzen naiz. Oraindik ez dut gauza garrantzitsuena egin, hau da, kontzertua, eta neka-neka eginda nago. Mugak horretan ere jarri behar ditudala pentsatzen dut; esan behintzat kontzertuaren egunean energia guztia jotzeko aurreztu nahi dudala, ez jartzeko beste showcase, elkarrizketa edo horrelakorik. Sahatsa eta Leire datoz eszenografia muntatzera, beraz, behintzat hori ez dut egin behar. Bi neska datoz bideo-elkarrizketa bat egitera Tik Tok-erako. Irribarre bat jarri, eta jatorra izatera. Nekagarria egiten zait batzuetan. Beraiek ez dute errurik, baina batzuetan nahi gabe, zootik ezin dudala atera sentitzen dut.
Eszenatokira ateratzen naiz, Sol Aretoa bete-beteta dago. Ze poza. Asko entzuten dute, eta aldi berean animatu eta dantzatu ere egiten dute. Adrenalina aurpegian eta guzti sentitu dezaket. Neska pilo bat hor nirekin batera musikaren parte bihurtzen.
Bukatzen da, oso sentsazio ona daukat. Pare bat lagun ikusten ditut, denak zoriontsu. Gero, kamerinora, norbaiten ezagunak sartzen dira, mozkorrak, drogatuak, batek daki, gauza onak eta baita arraroak ere esatera. Beste talde batzuekin konparatzen naute, oso gertu hitz egiten didate, txistua aurpegira botatzen didate hitz egitean. Gaua hain aspergarria da.
Aretokoak datoz, joan egin behar dudala esaten, eszenografia jasotzen duten paketeak eraman egin behar ditudala, eta baita instrumentuak ere, lehenbailehen. Ez dut ezer hartu inorekin, ez naiz lasaitu oraindik, eta taxi-furgoi batean nago, gau euritsu honetan, hotelera joaten traste guztiekin. Tira, behintzat polita izan da; horretan pentsatu, kontzertuan bakarrik, lo hartu baino lehen.
