Esanezin taldeak atzo BERRIAren alde Altsasuko (Nafarroa) Iortia kulturgunean emandako kontzertuak aho bete gozo utzi zituen ikus-entzuleak. Ianire Aranzabek, Arri Iraetak, Iñigo Asensiok eta Imanol Rubiok osatutako taldeak «ilusio bereziz» hartu zuen Altsasun jotzeko proposamena, eta bete egin zuten aretoa. BERRIAren aldeko kontzertua Altsasuko Udalari, Sakanako Mankomunitateari eta BERRIAlagunei esker antolatzen da urtero, eta aldiko talde bat izaten da protagonista. Iaz Ruper Ordorikak jo zuen BERRIAren alde.
Esanezin taldea Ianire Aranzabalen (Altzagarate, Gipuzkoa, 1999) proiektua izan zen hastapenean, eta bakarkako formatuan egin zituen lehen urratsak. 2021. urtean, zazpi abesti bildu eta Aireratzen disko laburra plazaratu zuen. Bakarlariaren proiektua banda bihurtu zen gero, Aranzabalek gainontzeko hiru kideak — Arri Iraeta (bateria), Iñigo Asensio (Hammond organoa) eta Imanol Rubio (gitarra)— bidelagun hartu zituenean. Jada talde gisa, Erretratu bat disko luzea argitaratu zuten 2023. urtearen amaieran.
