Gotaine-Irabarneko (Zuberoa) Xiru festibalak 23 urte beteko ditu aurten. Urtero bezala, Abotia elkarteak gai baten inguruan programatu du hiru eguneko festibala: Ez zirelakoz bat.
Mixel Etxekopar antolatzailearen azalpenen arabera, «ez zirelako ados» ulertu behar da erranaldian: «Beren erresistentzia arte bilakatu zutenak omenduko ditugu. Prefosta, gogoan ditut Francoren denboran ari ziren taldeak; Ez Dok Amairu eta Gaur, adibidez. Nonbait, halako denbora ilunetan poesia eta eskultura batek zerbait botere ukan zezakeen».
Ostiralean Eñaut Etxamendik kantatuko du, eta Jose Anjel Irigarai olerkaria izanen da gaualdi berean Ez Dok Amairu taldearen ordezkaria. Haiekin batean, festibala topaketa gisa pentsatua delako betiere, Alozeko kantariak arituko dira, besteak beste.
Larunbatean, berriz, erresistentzia eta kultura uztartzen dituen beste figura bat omenduko dute, Xiru-Sarri ikuskizunaren bidez. Ander Lipus antzerkilariak, Mixel Etxekopar txirulariak eta Jean Christian Galtxetaburuk prestatu dute Xiru-Sarri ikuskizuna, Joseba Sarrionandiaren testuetatik abiaturik. Uztaro elkartearen oholtzako instalazio eta bideo proiekzioez lagundurik estreinatuko dute ikuskizuna.
Xiru festibalean ohikoa da, bestalde, kanpoko kulturei lekua uztea. Hala, Oudaden ikusiko da larunbatean, sei kantari berberek osatzen duten taldea. Goizean, Chahab artista irandarraren eskultura bat estreinatuko dute, eta asteburuan Pas De Nom Pas De Maison Nantesko (Bretainia) musika bandak joko du.
Erresistentziako kulturgileak omenduko ditu 23. Xiru Festibalak
Hiru eguneko festibalak musikaz, artez eta ikuskizunez omenduko ditu garai ilunetan ere sortzaile izandakoak
Iruzkinak
Ez dago iruzkinik
Ordenatu
