Angela gorra da. Bikotekidearekin bizi da —Hector du izena, eta badu entzumena—, herritxo batean, eta zeramika estudio batean egiten du lan. Angela haurdun dago, eta, bikotekidea haurra jaiotzeko gogotsu badago ere, amaren gortasuna eritasun genetiko baten ondorioa denez gero haurrak %50eko probabilitatea du gorra izateko. Txikia jaio arte, ezingo dute jakin zer portzentajeren parte izango den, eta horrek bereziki kezkatzen ditu bai Angela, baita haren gurasoak ere —haiek entzuteko gai dira—.
Eva Libertad zinemagile murtziarraren (Espainia) lehen film luzea da Sorda. Aurtengo Berlinale jaialdian estreinatu zen, eta ikusleen saria jaso zuen Panorama sailean. Ondoren, Malagako jaialdian aurkeztu zuten, eta, bertan, filmik onenaren, gizonezko aktorerik onenaren eta emakumezko aktorerik onenaren sariak irabazi zituen, baita publikoarena ere.
Sorda luzearen jatorria 2021eko izen bereko laburrean dago. Luzean bezala, Miriam Garlo aktorea jarri zen istorio hartako protagonistaren larruan. Garlo eta Libertad ahizpak dira, eta aktoreak 8 urterekin galdu zuen entzumena. Emakume gor baten amatasunaz hitz egin nahi izan zuten laburrean, baina iruditu zitzaien gauza asko gelditu zitzaizkiela esateko, eta luzerako saltoa egin zuten. Garlok, ordea, argi utzi nahi izan du filma ez dela bere bizitzari buruzko kontakizuna: aktore gor bat da, berarekin zerikusirik ez duen emakume gor baten rola antzezten. Libertadek, hala ere, gertutik bizi izan ditu ahizparen zailtasunak, harentzat egina ez dagoen mundu batean nabigatzearen esperientziak, eta horietako hainbat pantailara eraman nahi izan ditu, gortasunari buruzko tesirik egin nahi izan gabe, eta pertsona gor eredugarri bat erretratatzeko asmorik gabe.
Gidoia idazteko garaian, zinemagileak dokumentazio lan sakona egin zuen. Etxean, ahizparekin, bizi izandakoaz gain, ama gorra izatearen esperientziaren berri izan nahi zuen, eta emakume ugari elkarrizketatu zituen haurdunaldiari, erditzeari eta bikote harremanean izandako aldaketei buruz hitz egiteko. Horrez gain, filmaketa esperientzia ahalik eta erosoena izan zedin, keinu hizkuntzako klaseak eskaini zitzaizkion lantaldeari, Libertadek gortasunari buruz egindako txostena banatu zen, eta bi interpreteren laguntza izan zuten une oro.
Melodrama bat izateko osagai guztiak dituen istorio batean, Libertadek neurriz lantzen ditu gaiak, kritikaren esanetan, didaktikoa izan nahi gabe, baina errealitatetik gertu. Enpatiaz eta sentsibilitatez, entzungor den mundu batean begirada zabaltzen du Sorda-k.
'SORDA'
Beste estreinaldi batzuk:
'QUIET LIFE'
Sergei eta Natalia jaioterritik ihes egitera behartu dituzte, eraso batean gizona ia hil ostean. Suedian kokatu dira bi alaba txikiekin, Migrazio Batzordeak asilo eskaeraren inguruan zer erabakiko zain. Ahal duten guztia egingo dute normal bizitzeko: gogor lan egin, alabak eskolara bidali, hizkuntza ikasi, eta agintarien aldizkako ikuskapenak jasan. Baina ukatu egingo diete asilo eskaera, eta, orduan, Katja, alaba txikiena, konorterik gabe geldituko da, eta koma misteriotsu batean sartuko da.
'UN PÁJARO AZUL'
Javierrek eta Valeriak urteak daramatzate haur bat izan nahian, baina ez dute lortzen. Egun batean, Camilak, Javierren lankide batek, esango die haurdun dagoela eta haurra Javierrena dela. Javier gatazka batean harrapatuta geratuko da, eta egunak igaro ahala, haren bizitza eta bikote bizitza kolokan geratuko dira.
'A NUESTROS AMIGOS'
Sarari eta Pedrori, Madrilgo langile auzo bateko gazteei, izugarri gustatzen zaie elkarrekin bazterrak nahasten ibiltzea. Baina udako oporretan, Sarak lagun berriak egingo ditu, eta beste mundu batean murgilduko da, antzerkiarenean.
