«Eta gazteleraz noiz?». Hori oihukatu zuen atzo Gasteizko Principal antzokian zegoen ikusle batek Euskal Herriko Gazte Orkestra Fundazioak antolatutako kontzertuan. Eneko Sagardoi aktorea narratzaile lanak egiten ari zen, eta hark salatu du gertatutakoa Twitterren. «Momentu desatsegina» izan zela aitortu du.
Gaur, momentu desatsegin bat bizi izan dugu Gasteizko @teatros_vitoria-n eman dugun kontzertuan. Beethoven-en 'Ah perfido!' eta 'Egmont' obrak aurkeztu ditugu @EgoFundazioa-rekin. Ez naiz biolina jotzen hasi, bigarren obrak testua dauka eta narratzaile lana egin dut.
— Eneko Sagardoy (@esagardoy) January 3, 2021
Ludwig van Beethovenen Ah perfido! eta Egmont obrak aurkezten ari da Sagardoi, EGO fundazioarekin batera; aktoreak narratzaile lanak egiten ditu bigarren obran. Atzo, Gasteizen, euskarazko lehenengo berbaldia bukatutakoan egin zioten oihu publikotik, baina normal jarraitu zuen kontzertuak.
Sagardoiren iritziz, «agian, euskara ez ulertzeak baino amorru handiagoa eman dio beste zerbaitek, baina baliteke ni erratuta ibiltzea». Izan ere, berak euskaraz irakurri aurretik, Jone Martinez sopranoak italieraz kantatu zuen Ah perfido!, eta alemanieraz Egmont, baina oihua euskara erabilitakoan gertatu zen.
Jaiotzaren 250. urteurrena
Garrasia «lotsagabea» izan zela idatzi du Sagardoik, baina gainontzean normal-normal egin zutela kontzertua. EGO Fundazioaren kontzertu birako bigarren emanaldia izan zen atzokoa —Donostian egin zuten lehena—, eta Ruben Gimenok zuzendutako ikuskizuna gaur 19:00etan Bilboko Euskaldunan ikusi ahalko da, baita bihar Getxoko (Bizkaia) Muxikebarrin ere.
Aurten Beethovenen jaiotzaren 250. urteurrena beteko da, eta horregatik ari da EGO konposatzaile horren bi obra aurkezten Gabonetan urtero egin ohi duen emanaldian. 46 musikari bildu dituen topaketaren aurkezpenean Ruben Gimenok nabarmendu zuenez, «ezinbesteko garrantzia» du gazte orkestrarekin Beethovenen musika lantzeak, «musikaren historiako giltzarrietako bat» baita.
Euskarafobia gaurko kontzertuan jasan behar izan duguna, obra jo bitartean amorru-sentsazioa ez zait gainetik kendu... https://t.co/G2Q2u1BYCS
— Αναι Τελλετχηα (@AnaiTelletxea) January 3, 2021
