Zita bikoitz batekin hasiko da datorren astelehenean Literaktum jaialdia. Eduardo Halfonek eta Unai Elorriagak beren lanik berrienak aurkeztuko dituzte, Tarántula eta Francesco Pasqualeren bosgarren arima, hurrenez hurren, lehena Okendo kultur etxean eta bigarrena Ernest Lluch kultur etxean, eta halaxe etorriko dira hurrengo egunak ere, proposamenez oparo, hilaren 11n hasi eta azaroaren 24ra bitarte. Denera, 30 ekitaldi baino gehiago izango dira (solasaldiak, aurkezpenak, erakusketak…), eta Letrak zeruertzean izenpean egingo dira denak, idazketaren eta gatazka sozial eta politikoen arteko joan-etorrietan jarriko baitu arreta aurten jaialdiak.
Ikusi gehiago
Adania Xibli, Dolores Redondo, Enrique Vila-Matas eta Carmen Molaren izenak iragarri zituzten lehen-lehenik antolatzaileek, eta zerrendara batu direnen artean daude orain Halfon, Fermina Cañaveras, David Ucles, Monika Zgustova, Sergio del Molino, Javier Zamora, Juan Manuel Zaragoza eta Antonio Monegal. Horiek izango dira jaialdiaren gai nagusiari propio loturiko solasaldietan parte hartuko duten idazleak.
Beste zenbait egilek, zehatzago, euren lan berrienak aurkeztuko dituzte: Fatma Aydemir (Demonios), Sabina Urraca (El celo) eta Maximo Huerta (Paris despertaba tarde), besteak beste. Beren azken liburuen inguruan arituko dira, halaber, Karmele Mitxelena eta Beñat Sarasola ere, Zoriona edo antzeko zerbait (Elkar) lanaren bueltan Mitxelena, hilaren 13an; eta Coca-Cola bat zurekin (Susa) nobelari buruz Sarasola, hilaren 18an.
Jaialdia hasi aurretik, berriz, ostegun honetan, Martin Caparros idazle argentinarrak Literaktum aperitifa eskainiko du Ernest Lluch kultur etxean, Antes que nada bere memoria liburua ardatz hartuta.
Jaialdiaren programazio osoa eta zenbait saiotarako behar diren gonbidapenak Literaktumen webgunean eskuragarri daude gaurdanik.
