Marta Cardenas artistarena da (Donostia, 1944) 49. Durangoko Azokako kartela. Eskuz egindakoa da, eta musutruk aritu da zeregin horretan. Zirriborroa eskuetan zuela aurkeztu du bere irudia. 2002an 63. Donostiako Musika Hamabostaldiko irudia egin zuen Cardenasek, eta iaz Obabakoak nobelaren 25. urteurreneko berrargitalpenerako ilustrazioa ondu zuen. Aurreko aldietan Itziar Okarizek eta Nestor Basterretxeak egin dute Durangoko Azokaren irudia, besteak beste.
Aurkezpen ekitaldian Nerea Mujika Gerediaga elkarteko zuzendariak azokaren gaineko hainbat xehetasun eman ditu. Adierazi duenez, iaz inoiz baino jende gehiago bildu zen azokara; hala ere, adierazi du zenbakiek ez dutela horren baikor egoteko arrazoirik ematen. Urte osoan "sukalde lanetan" aritu dira diru laguntza bila: "Azokak eutsi egingo dio diru galerarik egin gabe", ziurtatu du.
Azokaren ereduaz ez du zalantzarik egin: "Hau da guk nahi dugun azoka". Mujikak esan duenez, alderdi guztien aldetik jarrera ona izan dute, eta, horregatik, uste du horiek ere ontzat jotzen dutela eredua.
Iazko egunei eutsiko diete aurten, eta stand gehiago izango ditu azokak. Egitarau osoa hurrengo egunetan aurkeztuko du Gerediagak.
