Donostiako 59. Jazzaldia atzo amaitu zen, eta antolatzaileek adierazi dute «arrakasta itzela» izan duela. Guztira 185.600 entzule joan dira hirian antolatu dituzten kontzertuetara, eta inoiz baino pertsona gehiago ordainpeko kontzertuetara: 20.604.
Aurten ere, ohikoa denez, Zurriola hondartzako Keler guneak bildu du jende gehien: 123.000 entzulek gozatu dituzte Izaroren, El Columpio Asesinoren eta Larkin Poeren kontzertuak, besteak beste.
Bestalde, ordainpeko kontzertuetako askotan, hamahirutan zehazki, sarrerak agortu egin dira. Jazzaldiak salgai jarri dituen sarreren ia %90 saldu dituzte. Ordainpeko emanaldietara 20.604 lagun joan dira.
Jazzaldiaren 60. aldiari begira, antolatzaileek jakinarazi dute jada hasiak direla programazioa osatzen. 2025eko uztailaren 22tik 27ra egingo dute.
