Doinu berriak sortu, ikasi eta plazaratzeko

«Hauspo berri bat» eman diote Azpeitiko Kulturaz kooperatibaren Arkupehotsak proiektuari, eta egitasmo bat martxan jarri dute aurtengorako: sei musika talde edo bakarlari gaztek sormen egonaldiak egingo dituzte irekitzear den Azpeitiko (Gipuzkoa) Dinamoa sormen gunearen soinuaren eremuan. Egonaldietan «musikari bidelagun» bat izango dute —besteak beste, Olatz Salvador eta Tomas Lizarazu—, eta, amaitzean, kontzertu bat emango dute Sanagustin kulturgunean, «bidelagun» izan duten musikariaren kolaborazioarekin. Musika estilo desberdinak jorratzen dituzten sei artistak hartuko dute parte, eta bakoitzak bi asteburuko egonaldia egingo du. 16 eta 25 urte bitarteko musikariek parte hartu dezakete, eta jadanik irekita dago izen-ematea —uztailaren 15era arte egongo da zabalik—. Egonaldietan lotarako lekua eta otorduak ere sartuta daude.

Egitasmoaren hiru gako azpimarratu ditu Kulturaz kooperatibako kide den Aitor Bengoetxeak: doinuak sortzea, ikastea eta plazaratzea. «Proiektu honi forma ematerakoan, osotasun bati erantzun nahi genion. Prozesuari balioa eman nahi izan diogu, eta lanketa zabaldu». Azaldu du musikan hasierako pausoak ematen, taldeak sortzen edo lehen akordeak jotzen ari direnei begirakoa dela proiektua.

Esperientzia «osoa» izango dela nabarmendu dute, eta Dinamoaren soinuaren eremuan izango dutela «sormenari lekua egiteko» aukera. Ikaste prozesuan ere jarri dute arreta, formazioan eta bidelaguntzan. «Soinu teknikari eta adituak izango ditugu. Eta guretzat gako diren musikari erreferentzialak, proiektuari babesa emateko eta musikarientzat akuilu lanak egiteko». Esperientzia horren ostean egingo dute «plazaratzea», Sanagustin kulturguneko oholtzan zuzeneko bat emanez. Modu horretan, hiru jardun landuko dituzte: formazio teknikoa eta artistikoa; zuzenekoa prestatzeko entseguak; eta kolaborazioa musikari «erreferentzial» batekin, bai prestaketan, bai kontzertuan.

Hautatuko dituzten sei talde edo bakarlari horien «bidelagunetako bat» izango da Bulego taldeko Lizarazu. «Ilusioz» heldu dio proiektuari, eta hastapenak gogora ekarri ditu: «Alde batetik, [proiektua] oso beharrezkoa dela uste dut; gazteentzat eta talde berrientzat aukera ezin hobea izan daiteke. Beste alde batetik, oroitzapenak ekarri zizkidan, gu, Bulego taldearekin, Arkupehotsa egitasmo honen barruan egon ginelako orain dela urte batzuk». Babesa eta hasierako bultzada eskertu ditu, eta adierazi du esperientzia bizitzeko «gogotsu» dagoela. Salvador izango da beste bidelagunetariko bat. Gainerakoak, berriz, hautatutako bakarlari edo taldeek jorratzen duten musika motaren araberakoak izango dira.

Bestalde, proiektuan bidelagun izan dute Azpeitiko Udala. Eneritz Albizu Udaleko Kultura batzordeburuaren arabera, azken urteetan gogorarazi izan dute oholtzari garrantzia eman eta sortzaileari agertokiak eskaini behar zaizkiola, baina hortik harago doa kultur sustapena, haren hitzetan: «Oholtza gaineko jardun horren atzean dagoenari eman nahiko genioke garrantzia; sorkuntzari eta ondoren datorren lan guztiari».

Horri erantzun nahian jarri zuten martxan Dinamoaren egitasmoa. Proiektu horrek hainbat proiektu biltzen ditu, eta eremuetan banatuta dago: hitza, irudia, gorputza eta soinua. Bakoitzak badu «proiektu ardatz bat» edo eremu horren izaerari «bultzada» ematen dion egitasmo bat; soinuaren eremuan, Arkupehotsak litzateke. Bukatzeko fasean dago eremua.

Berriro plazaratu

2017an abiatu zuen Azpeitiko Kulturaz kooperatibak Arkupehotsak egitasmoa, «sortzaile berrien plaza izan nahi duen proiektua». Lau edizio egin dituzte aurreko formatuarekin, eta, Bengoetxea kooperatibako kidearen arabera, orain arteko emaitzak, ibilbidea eta esperientzia kontuan hartuta, «arnasa» hartu dute egungo baldintzetara ekarri eta atontzeko. Hala, beste forma bat eman diote proiektuari, eta esperientzia «osoago» bat eskaini: «Musika sortu, formatu, prestatu eta plazaratzeko aukera bat da».

Ikasteko eta esperimentatzeko espazioa ere izango da Arkupehotsak proiektua. Xedea da sortzaile berriei jarduteko tresnak eskaintzea, inguruan dauden sortzaileei balioa ematea eta belaunaldi berriei plaza bat ematea. Komunikazio eta promozio berezia ere egingo zaie parte hartzen duten musikariei.