Diana Krallek Donostiako 48. Jazzaldiaren azken egunean joko du

Diana Krall piano jotzaile eta abeslariak Donostiako 48. Jazzaldian joko du uztailaren 28an, azken egunean. Antolakuntzak jakinarazi du hurrengo urteko aldian Dave Douglas, Steve Swallow, Steps Ahead, Youn Sun Nah eta Gregory Porter, besteak beste, Donostiara etorriko direla; baita Pharoah Sanders saxofoi jotzaile mitikoa ere, aurreneko aldiz. Uztailaren 24tik 28ra egingo da Jazzaldia, eta Sandersek 26an joko du.

Egungo jazzaren divetako bat da Krall kanadiarra (1964). Errepertorio propioa konposatzeaz gain, tarteka jazzaren obra ahaztezinen bertsioak egiten ditu. Genero horretan disko gehien saltzen dituenetako bat da. Sanders estatubatuarrak (1941) ibilbide luzeagoa dauka. John Coltranerekin jotakoa, aditu askoren ustez saxo-tenor jotzaile onena da. Gregory Porter (1971) abeslariak ere arreta piztu du. Bi disko baino ez dituen arren, egungo bokalista handiena da, Jazz Times aldizkariarentzat. 24an arituko da.