Dantzaldi Ibiltaria Bilbora eta Donostiara iritsiko da lehenengo aldiz

Musikariz eta dantza maisuz osatutako Aiko taldeak «aurrerapauso bat» eman nahi izan du aurten, «euskal musikaren ondarea zabaltzeko ahaleginean». Dantzaldi Ibiltaria programaren bidez, euskal doinu eta dantza tradizionalak Bilbon eta Donostian irakatsi eta zabaldu nahi dituzte. Programa hori aurrenekoz iritsiko da bi hiriburuotara. Urritik ekainera bitartean, dantza tradizionalari buruzko ikastaro bat eskainiko dute Bilboko Campos antzokian, eta beste bat Donostiako Viktoria Eugenia antzokian,hasi berriarentzat nahiz estiloa hobetu nahian dabilenarentzat.

Bi hiriburu horiez gain, Aikok Galdakao, Sopela, Zarautz, Gernika eta Durango ere bisitatuko ditu, eta, hilean behin, ohiko erromeria antolatuko du Durangoko Plateruena kafe antzokian. Etzi aurkezpen jai handia egingo dute Bilboko BBK aretoan, erakustaldi tailerra eta zuzeneko erromeria barne.