CYNEFIN
'Shimli'.
Diskoetxea: Owen Shiers.
Jatorri zeltako musikarekin oroitzen garenean, Irlandako edo Eskoziako musikarekin oroitzen gara. Baita Bretainiakoarekin ere, eta, nola ez, hurbiltasunagatik, Galiziakoarekin ere bai. Galeskoak, ordea, ezezagunagoak gertatzen zaizkigu, ziurrenik hurbilen dituzten bi potentzia musikalen eraginez. Baina azken urteotan gero eta proposamen interesgarriagoak iristen ari zaizkigu handik. Horren adibide da Cynefin folk kantari eta ikerlariaren bigarren disko luze hau. Erabat galesez kantatutako folk garaikideko lan bat da. Ederrena: kantariaren ahotsa eta kantaera, melodia gozoak eta giro atmosferikoa. Ez espero biolin, gaita eta antzekorik, folk-pop gozotik hurbilago baitago diskoa musika zeltekin lotzen dugun topiko musikaletik baino. Begiak itxita entzutekoa.
