BECekoa ez zen izan azken-azkena. Iruñerriko Chill Mafia taldeak milaka lagunen berotasuna jasota esan zuen agur joan den ostiralean Barakaldon (Bizkaia), BEC erakustazokako Cubec aretoan. Izatez, Agur eta ohore deitu zioten kontzertuari, azken aldia zutela are eta gehiago nabarmenduz hala. Bada, ez: ostiral honetan Donostiako Dabadaban joko du Chill Mafiak, apirilaren 4ko iluntzean.
Aretoak eman du kontzertuaren berri, eguerdian zabaldutako argitalpen batean. Zehaztu dutenez, sarrerak 20:00etatik aurrera izanen dira salgai —Dabadabaren webgunean zabalduko dute bidea—, baina ohartarazi dute ez direla asko izanen. «Oso-oso-oso-oso-oso mugatuak dira», esan dute hitzez hitz. Eta zehaztu dute pertsonako bi baizik ezinen direla eskuratu.
Dabadabakoek gogora ekarri dutenez, Chill Mafiak areto horretantxe eman zuen bere ibilbideko lehenbiziko kontzertua. 2021eko martxoaren 27an izan zen, Dabadabaren zazpigarren urteurreneko jaialdian. Horregatik, «zirkulua itxi» eginen dela nabarmendu dute orain, «azken agurra» han eginda.
Ikusi gehiago
