Bulego musika taldeak eten bat egingo du 2025aren urte amaieran. Sare sozialen bitartez jakinarazi duenez, azaroaren 9an kontzertua emango du Bilboko Euskalduna jauregian, eta 2026an ez du zuzeneko emanaldirik egingo. «Urtebete baino gehiago iraungo duen geldialdi bat egingo dugu».
Azkoitiko (Gipuzkoa) taldeak Instagramen jarri du bideo bat, zeinetan Elena Irureta aktorea ere azaltzen den. Kafetegi batean azaltzen dira taldekideak eta Irureta, eta azken horrek galdetzen die ea egia diren etenaldi bat egingo dutela dioten zurrumurruak. Aktoreari erantzunez, Bulegoko kideek baieztatu dute etenaldia egingo dutela, eta 2026an «lan berrietan zentratuta» egongo direla. Hain zuzen, Bilbokoa «agur ospakizun bat» izango dela agertu dute.
2024a bukatu aurretik ere hainbat kontzertu ditu programatuak Bulegok. Larunbatean, Errenterian (Gipuzkoa) izango da; 20an, Basaurin (Bizkaia); 21ean, Tafallan (Nafarroa); 22an, Vianan (Nafarroa); eta 27an nahiz 28an, Azpeitian (Gipuzkoa).
Durangoko Azokan ere izan da taldea, eta han aurkeztu du datorren urtean egingo den Euskaraldirako kantua.
