B.O.T.H.
'Ihesean'
Diskoetxea: Egilea editore.
Iaz atera zuten lehen diskoa bizkaitarrek, hardcore estiloan eta abiadura bizian egindako kantu sortarekin. Aurtengo diskoak bide berari ekiten dio: bi ahotsetan landutako errepikak dira nagusi, haietako asko dezente ozenak (Egia, Oihukatuko dut, Gezurra...), eta zapatila dosi boteretsuak nonahi. Agian konplexutasun handixeagoaren falta sumatzen den arren, helburuak nahiko garbi dauzkan taldea dela dirudi, eta bete-betean lortzen dituztela esango genuke. Egia da gitarrari protagonismo handiagoa emateak kantuei mesede egingo liekeela, nahiz eta han-hemenka ñabardura oso interesgarriak uzten dituen (Kontrakultura, Ihesean). Noraezean abestiko gitarra solo motza ederra da, adibidez, baita Gezurra kantuko solo luzeagoa ere. Dena den, uste dugu taldeak oraindik gehiago eman dezakeela bere dohain guztiak batuta.
