Makina bat artista, aktore eta musikari ospetsuren aterpe izaten da Bilboko Arriaga antzokia urtero. Bada, badu zerrendara gehitzeko beste izen bat: Bill Murray aktore estatubatuarrarena. Ghostbusters (1984) eta Lost in translation (2003) filmetako protagonista izateagatik egin zen ezagun, eta New Worlds ikuskizuna taularatuko du orain Bilbon; datorren ekainaren 19an, 19:30ean. Ikuskizuna ingelesez izango da, baina euskarazko azpidatziak izango ditu —Arriagak adierazi duenez, «momentuan bertan inprobisatutako hitzetarako» izan ezik—. Sarrerak antzokiaren webgunean erosi daitezke jada.
Murrayk Jan Vogler biolontxelo jotzailearekin batera sortutako lana da New Worlds. New Yorken ezagutu zuten elkar, eta 2017an otu zitzaien proiektua gauzatzeko ideia. Musika, poesia eta literatura batzen dituzte, besteak beste, mundu mailan ezagunak diren artisten inguruan hitz egiteko: Mark Twain idazlea, George Gershwin musikaria, Ernest Hemingway idazlea... haiek Ameriketako Estatu Batueen eta Europaren artean eraiki zituzten zubiak azalduko dira emanaldian. Mira Wang biolin jotzailea eta Vanessa Perez pianista ere egongo dira oholtzan.
