Pabiloi 6 zaharra bezala, Bilboko Zorrotzaurre irlako lehengo txoko berean egongo da Pabiloi 6 berria, eta Pabiloi 6 antzoki zaharraren kudeaketa eredu bera izango du. Bilboko Udalarena izango da antzoki berria ere, eta Pabiloi 6 Arte Eszenikoen Sortzaile Elkarteak eta haren Gazte Konpainiak kudeatuko dute, orain artekoa bezala. Hasieran, egun martxan den antzokia zaharberritzea zen udalaren asmoa, baina haren oinarriak nola dauden ikusi ostean, erabaki dute beste eraikin bat egitea. Proiektuak 4.153.305 euroko aurrekontua izango du, eta abendurako edo urtarrilerako erabaki nahi dute lanak nork egingo dituen. Ordutik hasita, urtebete beharko dute antzoki berria eraikitzeko.
Gaur aurkeztu dute proiektua, Bilboko Udalean. Asier Abaunza Bilboko Udaleko Hiri Plangintzako, Proiektu Estrategikoetako eta Espazio Publikoko zinegotziak eta Kepa Odriozola Obra Publikoetako eta Zerbitzuetako zinegotziak eman dituzte azalpen teknikoak; Ramon Barea aktore eta Pabiloi 6 gunearen sustatzailea ere izan da haiekin. Antzerkigileak azaldu duenez, antzerkigileen beharrei erantzunez diseinatu du udalak antzoki berriaren proiektua. Horren erakusgarri, kamerinoak, tailerrak, biltegiak eta bulegoak hartuko dituen eraikin bat ere egingo dute, antzoki berriari itsatsita, eta, hari esker, ia 500 metro koadro irabaziko ditu guneak. Horren ondorioz, «L» forma izango du eraikin multzoak, eta 1.288 metro koadro inguruko eremua guztira.
«Ez da edozein gauza egin ahal izateko espazio bat izango: antzoki bat izango da»
RAMON BAREAAktorea eta Pabiloi 6-ren sustatzailea
Egungo antzokiaren bolumen bera izango du antzoki berriaren eraikin nagusiak, eta gogora ekarriko du aurrekoaren itxura industriala. Eraikin itsatsiak bezala, bi solairu izango ditu antzokiaren eraikinak ere, eta 228 ikuslerentzako lekua. Gainera, harmailen beheko partea biltzeko aukera ere izango da antzoki berrian.
Halaber, Bilboko Udalak adierazi du asmoa dutela antzokia egongo den inguruan plaza bat eraikitzeko.
Antzerkiaz bestelako ekitaldiak hartzeko aukera ere egongo dela zehaztu dute Bilboko Udal ordezkariek, eta gogorarazi egungo antzokiak ere halakoak hartzen dituela. Bestelako ekitaldiak ere hartuko dituzten arren, eraikin berria antzoki bat izango dela zehaztu du Bareak. «Ez da edozein gauza egin ahal izateko espazio bat izango: antzoki bat izango da».
Bareak poza eta esker ona adierazi ditu proiektuaren aurkezpenean, eta antzokian orain arte egindako lana hartu du gogoan. «Azken hamalau urteotako esperientziak erakutsi duen bezala, antzoki propio bat izateak biziagotu egiten du antzerkigintza». Gaineratu duenez, Pabiloi 6 «erreferentziazko itsasargi bat» da, kontuan hartuta gaur egun antzerkigintza zertan den. Eta, hain zuzen ere, gogoratu du Espainiako Eszena Zuzendarien ADE elkarteak haien lana saritu duela. Antzerkigintzan egindako lan nabarmena aitortu die elkarteak, Adolfo Marsillach saria emanda.
«Azken hamalau urteotako esperientziak erakutsi duen bezala, antzoki propio bat izateak biziagotu egiten du antzerkigintza»
RAMON BAREAAktorea eta Pabiloi 6-ren sustatzailea
Hasieran, Pabiloi 6 antzokia hartzen zuen eraikina jabego pribatukoa zen, eta konpainiako kideek urteak eman dituzte alokairuan. Zorrotzaurren egingo dituzten lanen harira, ordea, eraikina udalaren esku gelditu zen, irlako lurren berrantolaketaren ondorioz. Baina, antzokia udalarena izanik ere, Pabiloi 6 Arte Eszenikoen Sortzaile Elkarteak kudeatu du beti, eta hala izango da aurrerantzean ere.
Etenik ez
Antzerki programan ez da etenik egongo, gainera. Izan ere, Garabia espazioaren lanak amaitzean hasiko dituzte Pabiloi 6 antzokikoak, eta, beraz, eraikuntza lanek iraun artean, Garabia gunea baliatuko dute antzerkia eskaintzeko. Pabiloi 6 antzokiaren aurrez aurre dago eraikin hori, lanak martxan dira, eta espero dute udarako berriz ere zabalik egotea.
Pabiloi 6 antzokiarekin gertatutako gauza bera gertatu zen Garabia gunearekin ere. Pabiloi 6 antzokitik sortutako Pabiloi 6 Gazte Konpainiak erabili izan du leku hori azken urteetan. Udalarena da eraikin hori ere, eta Pabiloi 6 antzokia daraman elkarte berak kudeatzen du. Eta kasu hartan ere, eraikina zaharberritzea ezinezkoa zela ikusirik, eraikin berria egitea erabaki zuen Bilboko Udalak.
