Bosgarrenez eta azkenekoz. Bihar hasiko da azken Euskal Emakume Zinemagileak zikloa. Euskadiko Filmategiak antolatu du, Euskal Herriko Arte Garaikidearen museoarekin eta Artium museoarekin elkarlanean; gaur aurkeztu dute, Donostian. Zuzendari gazteenei egin nahi izan diete erreferentzia aurten —80ko eta 90eko hamarkadetan jaiotakoak—. Guztira sei zuzendariren hamabi film eskainiko dituzte Donostiako Tabakaleran, Gasteizko Artium museoan, eta Bilboko Bizkaia aretoan. Saioak bihar hasi, eta ekainera bitarte izango dira, 19:00etan.
Lehengo saioa Artium museoan izango da, eta 20.000 especies de abejas (2023) filma proiektatuko dute. Ostiralean Donostian eta larunbatean Bilbon emango dute. Nina (Andrea Jaurrieta, 2024) izango da zikloan proiektatuko den beste lanetako bat; Malagako zinema jaialdian saritua izan da aurten. Filmak mendeku istorio bat kontatzen du, eta Patricia Lopez Arnaiz da protagonista. Apirilaren 24an, 25ean eta 27an ikusi ahal izango da.
Jaione Cambordarentzat izan zen 2023ko Donostiako Zinemaldiko Urrezko maskorra, O Corno filmarengatik jaso zuen. Horren aurretik, 2019an zehazki, Arima sortu zuen, bere lehen film luzea. Maiatzaren 15ean, 16an eta 17an proiektatuko dute.
Dokumentalak
Aurten, lehenengoz, ia berdintsuak dira fikziozko lanen kopurua eta dokumentalena. Ione Atenearen Enero (2019) dokumentala izango da horietako bat —apirilaren 10ean, 11n eta 12an emango dute—. Zahartzaroaren gaia lantzen du lanak, 80 urtetik gora dituzten bi emakumeren bitartez. Bi emakume dira protagonista Polaris-en ere. Ainara Veraren ez-fikziozko lana da, eta bi ahizpak nabigazioaren munduan aurrera egiteko zer tirabira dituzten erausten du.
Euskal Herriko hedabide txikietan euskara nola erabiltzen den hausnartzen du Arduraz komunika dezagun-ek (Aitziber Zapiain, 2021). Kazetarien gogoetak jasotzen dira dokumentalean, hizkuntzaren erabilerak indarkeria matxistan izan dezakeen eragina aztertzeko helburuz. Ekainean egongo da ikusgai.
Programazioa ixteko saio berezi bat prestatu dute antolatzaileek. (H)emen elkarteak eta Zinebik elkarlanean antolatzen duten Aukera programako sei film laburrak proiektatuko dituzte. Zineman lehen urratsak egin nahi dituzten emakumeei zuzendutako mentoretza programa da. Saioak ekainaren 17an eta 24an izango dira, Artiumen eta Tabakaleran, hurrenez hurren.
Parte hartzea
Bost urtez, 50 zuzendari baino gehiagok parte hartu dute zikloan. Antolatzaileen esanetan, gutxienez film luze bat egin duen emakume orok bere filmografiako lanen bat aukeratu du ziklorako. Gaur egindako aurkezpenean, Euskal Emakume Zinemagileak-en parte hartu duten hogei zinemagile baino gehiago egon dira.
Joxean Fernandez Euskadiko Filmategiko zuzendariak zikloaren helburuetako batzuk aipatu ditu: «Euskal emakume zinemagileen talentua Filmategiaren pantailetan ematea, eta eurek beren lanak aurkeztea». Gainera, zinemagile bakoitzaren historiari eta haien filmografiari buruzko garapenaren inguruko ikerketa bat ere ontzen ari dira: Cineastas vascas.
