'Berriro asma nazazu'

Hirugarren lan luzea argitaratu zuen Tenpora taldeak udazkenaren etorrerarekin batera, eta aurrekoaren ildo berberetik doan disko bat da honako hau ere. Pop eta jazz doinuak nagusi, rock leunaren ukitu sotil batekin, melodia goxo eta ahots eztiz inguraturik ageri zaizkigu Berriro asma nazazu hau osatzen duten zazpi abestiak. Grabaketa 2020ko urte hasieran burutu bazuten ere, argitaratzea garai zailetan egin zuten, eta, aurtengo uzta oparo honen erdian, agian ez du merezi duen sona izan. Inongo zalantzarik gabe, entzunaldi batzuk merezi dituen lan bat da, bolada ilun hauetan goxotasun eta argitasun pixka bat ekarri eta esperantza apur bat zabaltzeko, edo haien musikarekin murgildu eta inguruko guztia ahazteko.