'Beltxarga beltza'

Bigarren lana argitaratzeaz bat, Euskal Herri osoan barrena zabaltzen hasi da Ibil Bedi taldearen izena, eta, nola ez, musika. Nafarren Beltxarga beltza honetan pop doinuz bustitako 11 abesti aurki daitezke, hiru ahotsen arteko jolasean, taldeetan aurkitzera ohituta gauden gitarraz, baxuaz eta bateriaz gain, biolin, piano eta saxofoiarekin edertuta. Inolako apaindura berezirik gabe, soinu ezberdin eta esperimentalen bila joan gabe, sinpleki jakin dute edertasuna bere horretan azaltzen. Askotan aipatzen ditugu digeritzea kosta egiten diren lanak; bada, hau, hasiera-hasieratik goxo irentsi eta konturatu orduko barruraino sartzen zaizun horietakoa da, entzunerraza eta, era berean, barrena betetzen dizuna.