Atzerrian euskal kultura zabaltzeko 1,3 milioi euro jarriko ditu Etxeparek

Bere aurrekontuaren ia erdia, 1,3 milioi euro, euskal sortzaileen lanak nazioartean sustatzera bideratuko du Etxepare Euskal Institutuak. «Euskal sortzaileen ekimen eta beharrei» erantzutea da diru laguntzen helburua, «haien nazioarteratzea ahalbidetuz eta haien jarduerak bultzatuz».

Kopuru horretatik 751.359 euro atzerrian euskal kultur ekoizpena sustatzeko izango dira, eta beste 600.000 euro, berriz, munduko hainbat unibertsitatetan irakurle programak, katedrak eta bekak sortu eta mantentzeko. Deialdia herenegun eman zen argitara Euskal Herriko Agintaritzaren Aldizkarian, eta hilabeteko epea dago eskaerak egiteko. Eskaera batek jaso dezakeen gehienezko laguntza 18.000 eurokoa da.