Arkaitz Basterrak bere azken lana aurkeztuko du Zornotzan, 8an

Arkaitz Basterra zinemagileak bere azkeneko lana, Zápisky z Café Louvre dokumentala (Louvre kafeko egunerokoak) aurkeztuko du asteartean, Zornotza aretoan, bere jaioterrian (20:00etan eta 21:30etan). Artisten, zientzialarien, enpresarien, politikarien eta pertsona anonimo askoren topalekua izan zen Louvre 1902 eta 1948 artean. Polizia komunistak txikitu egin zuen urte hartan, eta 1992an, berriro ireki zituen ateak.

Pragan bertan estreinatu zuen dokumentala Basterrak joan den abenduaren 6an, eta bai publikoak eta bai kritikariek harrera oso ona egin zioten lanari, Zornotzako Udalak atzo bidalitako ohar baten arabera. Lan horrekin, dokumentalen trilogia bat osatu du Basterrak, 2006an Agian, eta 2009an Life and Film (The Labyrinthine Biographies of Vojtech Jasny) egin ondoren.