'Arima Soul'

Soul musikak benetakoa izan behar du, edo ez da izango. Konposizioa, exekuzioa eta hitzen eta musikaren sinesgarritasuna bermatuta daude, ordea, laukote zarauztarraren bigarren grabazio honetan. Denetik topatuko dugu: 1960ko hamarkadako soul fin eta sustraiduna (Gu andereak single garbia, Arima du...), instrumental elektriko bat (Dortoka pausoa), jazz fusioa (Lokatzan dantzan), swing sakoneko piezak (Norabide okerra), baita soul balada eder bat ere: Itsasoan. Soula era irekian lantzen dute Arima Souleko kideek, betiere soul musikaren historian bidelagun izan diren hibridazio hainbatekin jolastuz. Erritmo basearen sentimenduak eta Lidia Insaustiren magiaz betetako ahotsak maila handia ematen diete konposizioei.