Aretorik ezean, zalearen etxera zuzenean

Dagoeneko bada aukeraren bat kontzertuak zuzenean eta presentzialki ikusteko —ostiralean Zea Mays izan zen, adibidez, Donostiako Viktoria Eugenian—, baina ale urriak dira oraindik. Horregatik, gaur egungo baldintzekin ateak irekitzeko zailtasunak dituzten areto batzuk hasiak dira beste formatu batzuk ere erabiltzen. Hain zuzen ere, Gasteizko Jimmy Jazz aretoak egindako eskaintza baten ondorioa izango da Izaki Gardenak taldeak gaur online emango duen kontzertua.

Izan ere, taldeak egonaldi artistikoa egin du Jimmy Jazzen aste honetan, eta hor sortutako kantu berriak erakutsiko ditu gaurko kontzertuan. Gainera, ohiko kontzertu baten ahalik eta antzik handiena izan dezan, momentuan bakarrik ikusiko da. Koronabirusaren krisia piztu zenean, Izaki Gardenak Dena Oskol diskoaren aurkezpen birako azken kontzertuak ematen ari zen.