Araiako umore antzerkiaren jaialdian 54 saio izango dira aurten

Porpol antzerki taldeak 1994an gauzatu zuen Aiaraldean umore antzerkiaren jaialdi bat antolatzeko ametsa, eta, ordutik, antzerkizaleek hutsik egin gabe izan dute proposamen bat Arabako ibar horretan. Hala, hogeita laugarren ediziora heldu da jaialdia, eta 20 ikuskizun —54 emanaldi— programatu dituzte aurten.

Egitarauaren erdigunea, ohi bezala, Araian egongo da, abuztuaren 11tik 15era bitartean. Horrez gain, Arabako hamazortzi herritara helduko da antzerki eskaintza, datorren hilaren 5etik 26ra bitartean. Jaialdirako giroa berotze aldera, ostiralean, Zurrunka teatroren Ac Nun. Un ciprés en el desierto ikusi ahal izan zuten Araiako Andra Mari aretoan. Atzo, toki berean, Parasite Kolektiboaren Hot Water eman zuten, eta Malkoa antzerki konpainiakoek Jodidos amantes eskainiko dute gaur, 20:00etan.

Arrazpi Berri kiroldegia izango da, ohi bezala, Araiako egitarauaren ardatza. Abuztuaren 11tik 15era bitartean, bertan ikusi ahal izango dira, hurrenez hurren,El tipo de la tumba de al lado (Txalo Produkzioak), Perplejo (Imaquinario), Comedia multimedia (Emilia Yague - Kendosan), Ez dok hiru (Tartean teatroa) eta Héroes (Pentacion). 22:30ean izango dira emanaldi guztiak. Horiez gain, Araian ikusi ahalko dira, besteak beste, Crazy Mozartsen Mundo Costrini, Campi Qui Puguiren Manneken's Piss, Maite Guevararen Ahora, Bapatean-en Baserriko porrusalda eta Tornadoren Lapurminak.

Araiatik kanpokoak

Amurrio, Gesaltza Añana, Oleta, Kexaa, Berantevilla, Bernedo, Oteo, Korres, Bastida, Komunioi, Laudio, Maeztu, Manzanos, Okondo, Pobes, Rivabellosa eta Abeziaraino ere helduko da aurten Araiako jaialdiaren itzala. Abuztuaren 26ra bitartean, herri horietan ikusi ahal izango dira, besteak beste, Bambolea & Alas de Circoren Bambalas, Pass & Companyren Juguete Roto 3Po, Capitan Maravillaren El asombroso Dave Wonderthing eta Terronen Tierra efímera.