«Antzeztea talde lana da, edo bestela ez da ezer»

Alex Angulo aktoreak Zinemira saria jaso zuen atzo iluntzean, Euskal Zinemaren Galan. , Imanol Uribe iaz saria jasotako zuzendariak eman zion Koldobika Jauregi eskultoreak diseinaturiko oroigarria antzezle erandiotarrari. Biek Segoviako ihesa filmean egin zuten elkarrekin lan estreinakoz. «Uriberekin ikasi nuen zinema ikusten, eta harekin egin nituen lehen hutsak eta lehen gauza onak zineman», adierazi zuen Angulok Viktoria Eugenia antzokiko agertokian.

Comicos de la Lengua eta Karraka antzerki taldeetan hasi zen Anguloren ibilbidea, Ramon Barearen eskutik. «Lagun haiekin guztiekin ikasi nuen bizitza antzoki bat dela eta antzeztea bizitzea dela». Alex de la Iglesia -«pelikula magiko batean parte hartzeko aukera eman zidan, El día de la bestia-n»- eta Enrique Urbizu zuzendariak ere gogoan izan zituen, eta antzeztea «talde lana» dela azpimarratu zuen, «edo bestela ez da ezer. Bigarren mailako aktorerik gabe ez dago protagonistarik, eta alderantziz»

Elena Iruretak eta Koldo Martinezek aurkeztu zuten ekitaldia, eta Blanca Urgell Eusko Jaurlaritzako Kultura sailburua, Antonio Rivera sailburuordea, Maria Jesus Aranburu Gipuzkoako Kultura diputatua eta euskal zinema eta antzerki munduko ordezkari ugari izan ziren bertan. Angulok saria jaso ostean, Txaber Larreategi eta Josu Martinezen Debekatuta dago oroitzea estreinatu zuten.