ANNA FERRER
'Parenòstic'.
Diskoetxea: La Castanya.
Bakarkako hirugarren diskoa du Menorcako kantariak, eta, berriro ere, irlako kantutegi tradizionala darabil begirada garaikideaz. Aurreko biekin alderatuta, ordea, azken honetan arrisku gehiago hartu ditu eta modu lehorragoan landu du material tradizionala. Horretan, ziurrenik, zerikusi handia du Niño De Elche aritu izanak ekoizle lanetan. Menorcakoaren ahotsa da, zalantzarik gabe, Parenòstic honetako protagonista: haren ahots gozoa, gordina, lur zaporekoa. Biluzi agertzen da, elementu bakarraren laguntzaz, gehienetan: elektronika primitiboa eta musika-tresna organikoren bat besterik ez (gitarra, mandolina...). Azken finean, kantu-disko bat da, kantu-disko eder bat.
