'Animalia naiz eta'

Ez da horren ohikoa gaur egun kide gaztez osatutako taldeek herri kanta jorratzea, baina hala egiten du Habia hirukoteak. Biolinarekin, biolarekin eta biolontxeloarekin lagunduriko ahotsekin soilik plazaratzen ditu abestiak lapurtar eta baxenabartar taldeak, herrikoiak edota hainbat euskal idazlerenak diren hitzak Kristof Hiriarten musika konposizioen laguntzaz interpretatuz. Musika tradizional eta klasikotik urruti ez dauden doinuak, batzuei atzera eragin ohi badiete ere, hemen ez dira batere nekagarri eta astun gertatzen; are gehiago, benetan gustura entzuten den disko bat osatu dute. Gustu handiz sortu eta landuriko abestiak, fintasunez baina intentsitatez —eta batzuetan gordinki ere— dakarzkigute estreinako lanean.