the lemon twigs
'A Dream Is All We Know'
Diskoetxea: Captured Tracks.
Iaz plazaratutako Everything Harmony zoragarriaren jarraipena da A Dream Is All We Know hau, zeina Bilboko Kafe Antzokian aurkeztuko duten D’Addario anaia estatubatuarrek, datorren asteazkenean, hilaren 29an. Bada, honetan ere, bere horretan jarraitzen du bikoteak; hau da, 1960ko urteetan sustraitutako eta psikodelian bustitako kantutzar popzale kolosalak idazten. Gaitasun horren ondorioz, kopia hutsalaren itzala aise gainditzeko ahalmena agertzen dute, bi sortzaileen idoloen eraginak nabarmenak izanagatik ere; tartean, The Beatles, The Who, The Beach Boys eta Big Star. Munstro klasikoen ondarea gaurkotzea kontu zaila da, baina anaiek duintasunez, ahalmenez eta errespetuz egiten dute hori.
