MAHL KOBAt
Azalera taldean ibilitako Beñat Bidegain gitarra jotzaile ondarroarrak bide ezberdina landu du azkenaldian: bere bakarkako proiektua, barnerakoia eta akustikoa. Atmosfera pausatuek badakarte, bide batez, biluztasun absolutuaren sentsazioa ere, soilik barren-barrenetik irten daitekeen gordintasuna azaleratzen duena. Planteamendua erraietakoa da, segur aski nahiko hertsia eta hermetikoa, nahiz eta akaso beste formatu baterako ere balio duten konposizioek. Haren gitarra eta ahotsa gailentzen diren arren, instrumentazio xumeak ere sartu ditu han-hemenka, hala nola sintetizadorea, baxua edo txistua. Soinu zaratatsua dakar, aldiz, Etorkizuna VI-ren bukaerak, baita Mar de viento-ren distortsioak ere. Kantautore baten opera prima dugu hauxe, eta hainbat fruitu mota eman ditzake oraindik, nahiz eta bere antikomertzialtasunak nortasun traza batzuk erakusten dizkigun.
