Fantasiazko eta Beldurrezko Zinemaren Astea hurbiltzen doan heinean, hainbat berrikuntza iragarri ditu antolakuntzak. Haien artean, Animedon Donostiako anime topaketaren berri eman dute, animearen inguruan osatutako programazio berria. Azken urteetan Japoniako zinemak eta kulturak protagonismo nagusia jaso dute Fantasiazko eta Beldurrezko Zinemaren Astean, eta, horri emandako babesa ikusiz, aurten aurrerapauso bat eman dute. Horregatik, zinema japoniarraren emanaldiez gain, beste programazio paralelo bat sortu dute, animearekin zerikusia duena, erakusketaz, hitzaldiz eta omenaldiz beteta. «Gaur egun anime eskaintza oso handia da, baina dena plataforma digitaletan dago, eta zinema aretoetan oso gutxi proiektatzen da. Horregatik, horrelako aukerak paregabeak dira», esan du Animedonen sustatzaileetako batek, Harri Fernandez kazetariak.
Fernandezek argi dauka historikoki animazio japoniarraren zaleentzako «aterpe bat» izan dela Astea, eta aurten, antolatzaileek, pisu gehiago eman nahi izan diote horri. Horren arrazoietako bat, zinema aretoak berritzean datza, hau da, jende gaztea hurbiltzen saiatzean. Antolakuntzak ohar bidez adierazi du ikerketa batek dioenez, 90eko hamarkadatik aurrera jaiotako gazteek animea edo japoniar animazioa asko kontsumitzen dutela, haietako %42k astero, zehazki. Horregatik, Fantasiazko eta Beldurrezko Zinemaren Astea belaunaldi berrietara hurbiltzeko, horrelako egitasmoak lagungarriak dira. «Animedonen programatutako film luzeak ez dira nahitaez fantasia eta beldurrezko generokoak izango, Astean gertatzen den bezala, baizik eta eskaintza tematiko zabalagoa izango dute», adierazi du antolakuntzak.
Ez dira gutxi euskarara bikoiztutako animeak. Hala nola Shin Chan, Pokemon, Doraemon edo Dragoi Bola. Azken horrek belaunaldi oso bat eduki zuen telebistari begira duela urte batzuk. Hain handia izan da Dragoi Bolak izandako eragina, Animedonen leku berezia eskainiko baitiote. Akira Toriyamak egindako mangatik sortu zen telesaila. Aurten zendu zen Toriyama, eta, horregatik, Animedonek bere «irudia eta obra» omendu nahi ditu. «Aurten Toriyama zentzeaz gain, 35 urte bete dira EITBk lehen aldiz Dragoi Bola euskaraz igorri zuela, eta, horregatik, aurtengo gai nagusia Dragoi Bola izango da», azaldu du Fernandezek.
Donostiako parte zaharreko Antzoki Zaharreko pareta Dragoi Bolaren irudiekin apainduko dute, esandako omenaldiaren harira. Innovart estudioko Mikel Herrerok hartu du pareta apaintzeko ardura. Antzoki berberean, urriaren 20an, Animadonen ekitaldi nagusia egingo da: Son Gokuk euskaraz hitz egin zuenekoa. Antolakuntzak adierazi du Dragoi Bola euskaraz bikoiztu zuten bikoizleak omenduko dituztela ekitaldi horretan. Xabier Amuriza izan zen Dragoi Bolaren lehenengo bikoizketa zuzendaria, eta urriaren 20an bertan egongo da. Harekin batera, Seve Atencia, Goku eta Gohanen ahotsa; Ana Guadalupe Fernandez, Bulmaren ahotsa eta kredituen sekuentziako abeslaria; eta Joxe Felipe Auzmendi, kazetaria, ETBko aurkezlea eta Freezerren ahotsa izango dira.
Bi erakusketa
Bikoizleen omenaldiaz gain, telesailaren lehen kapitulua ikusteko aukera izango da. 1989. urteko urriaren 4an igorri zen lehen aldiz Dragoi Bola euskaraz EITBn, eta, handik 35 urtera, Ylenia Benito kazetariak gidatuta eta EITBren babesarekin, berriro proiektatuko da. Ekitaldi nagusiaz gain, Dragoi Bolaren harira, bi erakusketa jarriko ditu abian Fantasiazko eta Beldurrezko Zinemaren Asteak. Alde batetik, Dragoi Bolatik infinitura erakusketan, 26 ilustratzaileren lanak aurkeztuko dira, telesaila oinarri dutenak. Parte hartu duten artisten artean Alba Cardona, Paul Urkijo, Joseba Larratxe eta Borja Crespo daude. Lehen erakusketa hori Udal Liburutegiko jarduera aretoan egongo da.
Azkenik, Euskadi Fantastikoaren barnean, Alderdi Eder Liburutegi Nagusian Nacho Fernandezeri atzera begirakoa eskainiko diote. Dragon Fall, japoniar telesailaren parodiaren egilea da Fernandez. Animedonen programazio osoa, eta proiektatuko diren pelikulen zerrenda «laster» iragarriko dutela adierazi du Fernandezek.
