Alma Soderbergen 'Cosas' obra saritu du Bilboko ACT jaialdiak

Hainbat herrialdetako 11 sortzaile berrik aurkeztu zituzten lan laburrak Bilboko ACT jaialdira. Guztien artetik, Alma Soderberg-en Cosas izan da hoberena, epaimahaiaren ustez, eta suediarrari eman ziotenACT Arriaga saria larunbat gauean, Kafe Antzokian eginiko ekitaldian. «Momentu oro harritzen duen agerpen eszeniko elektriko bat» da lana, epaimahaiaren aburuz; «konprometitua, erregistro anitzekoa, ikusleak zirikatu eta emozionatu egiten dituena». Soderberg antzezle «ausart, zintzo eta zuzena» dela iritzita eman zioten sari nagusia.

Koldo Arostegik irabazi du gizonen atalean interpretazio onenaren saria, Rocio y Nino lanagatik, eta Marielle Moralesek emakumeenean, B.U.R.-gatik. Zuzendaritza koreografiko onenaren saria Yukiko Suzukirentzat izan da.